Дагъустандин ЦПЭ-дин (центр поддержки экспорта) кьил Руслан Абаскъулиева хабар гайивал, республикада гьазурзавай мижеяр маса гуз Австралиядиз, хъицикьдикай ийизвай милли бармакар — США-диз ва шторар (пердейрин чкадал дакIарриз ядай затIар) Англиядиз рекье тваз эгечIнава.
Адан гафаралди, алатай йисуз Дагъустандай тир 19 карчиди чпи арадал гъизвай метягь маса гун патал къецепатан уьлквейрин базарриз акъудна. И кар алай йисузни давам жезва.
Къейд ийин хьи, Дагъларин уьлкведа гьасилзавай жуьреба-жуьре суьрсет Къазахстандин, Узбекистандин, Швейцариядин, Азербайжандин ва маса уьлквейрин базарранни маса гузва.
Р.Абаскъулиева алава хъувурвал, къецепатан уьлквейрин муьштерийри чи чукIулриз, Къизлярда гьазурзавай коньякриз итиж ийизва.
Центрадин делилралди, 2021-йисуз маса гун патал Дагъустандай къецепатан уьлквейриз акъудай метягьрин къиметди 69,91 доллар тешкилна, 2020-йисав гекъигайла, — 29 процентдин гзаф.
«Лезги газет»
