Алатай жуьмядиз Махачкъалада Росгвардиядин Дагъустан Республикада авай Управленидин сад лагьай ОМОН (отряд милиции особого назначения, адаз гила ОМОН “Горец” лугьузва) арадал атана 30 йис тамам хьуниз талукьарнавай шад мярекат кьиле фена. Ана Росгвардиядин Кеферпатан Кавказдин округдин командующийдин заместитель — генерал-майор Игит Менафова, Дагъустандин Гьукуматдин Председателдин заместитель — генерал-майор Рамазан Жафарова, Росгвардиядин Дагъустан Республикада авай Управленидин начальник — Россиядин Игит Мегьамед Баачилова, отряддиз виликдай регьбервал гайи полициядин отставкада авай полковникар — Шамхал Гьаммадова, Россиядин Игит Загьид Загьидова, Микаил Макашарипова ва Макка Къурбанова, республикадин са жерге министерствойринни ведомствойрин векилри, ОМОН-дин ветеранри, пак буржи кьилиз акъуддайла, телеф хьайи омоновчийрин хизанри, гьа гьисабдай яз аялри — гележегдин аскерри иштиракна…
Куьруь къейд. Санлай къачурла, алатнавай девирда отрядди терроризмдиз акси — 336, тади гьалда гел жагъурдай -1024, общественный хатасузвал таъминардай 1360 серенжемда иштиракнава. Къуллугъдин рекьяй везифаяр кьилиз акъуддайла, 58 кас телеф хьана. Чпел залан хирер-кьацIар хьайи 187 къуллугъчидикай 58 кас инвалидриз элкъвена. Алатнавай йисара къалурай кьегьалвилерай 253 къуллугъчи ведомстводин ва гьукуматдин шабагьралди, гьа гьисабдай яз са кас Россиядин Игитвилин тIвар гуналди (ОМОН-дин виликан командир З.Загьидов) къейднава. Полициядин полковник Мустафа Исмаилова алай вахтунда отряддин командирдин везифаяр вахтуналди тамамарзава.
Мярекат митингдилай башламишна. Ам, сифте гаф рахуналди, полициядин генерал-майор Мегьамед Баачилова ачухна. Ада Дагъустан, гьакI Кеферпатан Кавказдин регионар патални четинди тир 1991-йисуз арадал атай отряддин везифайрикай, агалкьунрикай куьрелди суьгьбетна. Алатнавай йисара ОМОН-дин къуллугъчийри республикада ислягьвал ва къанун-къайда хуьник еке пай кутурди, международный террористрин кIватIалри гьужумай макъамда ОМОН-дин къуллугъчийри къалурай кьегьалвал тариф авуниз лайихлу хьайиди, исятдани абуру чпин пак тIвар, пак буржи вини дережада аваз кьилиз акъудзавайди къейдна.
— Къенин юкъуз завай инанмишвилелди лугьуз жеда, отряддивай вилик эцигнавай гьар гьи жуьредин хьайитIани везифаяр — общественный хатасузвал хуьнилай махсус серенжемра иштиракунал къведалди кьилиз акъудиз алакьда. КьетIендаказ заз ОМОН-дин ветеранризни сагърай лугьуз кIанзава. Куь кьегьалвални жуьрэтлувал амайбуруз чешне я. Куь тежрибади, чирвилерини камаллувили акьалтзавай несилдиз руьгьдинни ахлакьдин ва ватанпересвилин тербия гунин карда куьмекзава. За отряддин вири къуллугъчийриз сувар тебрикзава, квехъ чандин сагъвал ва хизанра хушбахтлувал хьана кIанзава. Гьакъисагъвилелди къуллугъ кьилиз акъудзавай куьн сагърай! — алхишна М.Баачилова.
Микрофондихъ генерал-майор Игит Менафов атана. Кеферпатан Кавказдин командованидин ва вичин тIварунихъай ада лишанлу вакъиа тебрикна, омоновчийри чпин вилик эцигнавай везифаяр гьакъисагъвилелди кьилиз акъудзавайди къейдна.
Гуьгъуьнлай митингдал генерал-майор Рамазан Жафаров рахана. Дагъустандин Кьилин везифаяр вахтуналди тамамарзавай Сергей Меликован ва вичин тIварунихъай лишанлу югъ тебрик авунихъ галаз сад хьиз, ада С.Меликова рекье тунвай тебрикдин Чар кIелна. Ана ОМОН-дин къуллугъчияр гьамиша виниз тир пешекарвилелди, дирибашвилелди тафаватлу хьайиди, къенин юкъузни и рекье абуру чпин везифаяр пешекарвилин виниз тир дережада аваз кьилиз акъудун давамарзавайди, абурун алакьунар гьукуматдин ва ведомстводин шабагьар гуналди лишанлу авунвайди (ва икI мад) кхьенвай.
ОМОН-дин 30 йисан юбилей тебрик авурбурун арада Дагъустандин къенепатан крарин министрдин заместитель Дмитрий Гутыря, отряддин виликан командирар ва масабурни авай.
Отряд патал лишанлу юкъуз кIвалахдин рекьяй тафаватлу хьайи къуллугъчийрив ведомстводин ва гьукуматдин дережайрин шабагьар ва къиметлу пишкешар вахкана.
Митинг, кIватI хьанвайбур вири са декьикьада кисна акъвазуналди, кIвалахдин везифаяр кьилиз акъуддайла телеф хьайи юлдашрин экуь къаматар рикIел хкуналди, ОМОН-дин базадин гьаятда абуруз хкажнавай памятникдал цуьквер эцигуналди, отряддин къуллугъчияр жергедаваз устадвилелди финалди акьалтIна.
Гуьгъуьнлай суварин мярекатар башламишна. Лишанлу йикъаз талукьарнавай еке программа гьазурнавай. КIватI хьанвайбуруз яракь гваз, гьакI гъилералди кукIунин приёмар, четинвилериз дурум гудай къайдаяр, яракьдай ягъунар, тахсиркарар кьуниз талукьарнавай гьерекатар, гьакI подразделенийрин арада акъажунар ва икI мад къалурна.
Идалайни гъейри, ОМОН-дин къуллугъчийри женгина ишлемишдай яракьдин, экипировкадин, отряддин транспортдин выставкани ачухнавай. Мярекатдин иштиракчийриз чуьлдин кухняда аскеррин кьилин тIуьнар — гречкадикай, чIа-харикай (перловка) тушёнка кваз гьазурнавай хапIаяр — дадмишдай мумкинвални авай.
Рагнеда Рамалданова