КIватI хьанвайбурухъ элкъвена, региондин Кьили “Омикрон” цIийи штамм майдандиз акъатунихъ галаз алакъалу яз гьалар мадни кIеве гьатдайдакай малумарна. ГьикI лагьайтIа, чи уьлкведа и штаммдик начагъ хьанвай кьве дуьшуьш дуьздал акъуднава.
ЦIийи штаммдин кьетIенвилер фикирда кьуна, федеральный дережада начагъвал тайинарун патал виликдай къалурнавай 72 сятдин чкадал гила тест авурдалай гуьгъуьниз 48 сятдилай нетижадикай малумарун лазим я. Идахъ галаз алакъалу яз Дагъустандин регьберди республикада кардик квай талукь тир нормативра дегишвилер хтун лазим тирдакай лагьана.
Республикадин Кьили талукь тир органрал коронавирусдихъ галаз алакъалу ахтармишунар са шумуд сеферда артухарун тапшурмишна. Ида инсанар начагъ яни, тушни гьа сифте вахтара дуьздал акъудда ва абурув духтуррин патай талукь куьмекни агакьда.
Алатай гьафтеда 66493 ахтармишун кьиле тухвана, яни гьар 100 агъзур агьалидин кьилиз 307,8 тест авуна. Им федеральный дережада тайинарнавай къайдайрихъ галаз кьазва.
Къейд авун лазим я хьи, республикадин вири муниципалитетра гьалар хъсанбур я лугьуз жедач. Хейлин районра тестер ийизвай агьалийрин кьадарар лап тIимил я. Абурук ЦIунти, Гергебил, Лак, Гуниб, Гумбет ва Акуша районар, Дербент, Каспийск, Избербаш шегьерар акатзава. С.Меликова ихьтин гьаларихъ галаз алакъалу яз муниципалитетрин кьилерин хиве жавабдарвал гьатзавайди рикIел хкана.
«Лезги газет»
