Республикадин мектебра кIелзавай агъзурралди аялри Вирироссиядин олимпиадада иштиракзава, хабар гузва РД-дин образованидин ва илимдин министерстводи. Декабрдин эхирдалди олимпиададин муниципальный пай кьиле физва, и вахтунда идалай вилик, яни школайра кьиле фейи паюна гъалиб хьайи аялри гьуьжетарда.
Гуьгъуьнлай къвезвай турдиз гьар йисуз мектебда хьайи паюна иштиракай гьар вад лагьай ученик, яни 500 агъзурдалай гзаф аялар акъатзава. Адет яз, олимпиада умуми образованидин 24 предметдай — математикадай, урус чIалай, информатикадай, физикадай, химиядай, биологиядай, экологиядай, географиядай, астрономиядай, литературадай, тарихдай, обществознанидай, экономикадай, ихтияррай, искусстводай, физкультурадай, технологиядай, ОБЖ-дай ва къецепатан уьлквейрин чIаларай (ингилис, френг, испан, китайдин, итальян) тухузва. Къейд ийин, муниципальный пай 25-декабрдалди давам жеда. Ам 7-11-классра кIелзавай аялар патал фикирда кьунва. Гуьгъуьнлай региондин пай башламишда, адан нетижайралди эхиримжи паяра иштиракдай аялар хкяда. Региондин ва эхиримжи паяра 9-11-классра кIелзавай аялривай иштиракиз жезва.
Мектебра кIелзавай аялриз Вирироссиядин олимпиадада гъалиб хьуни Россиядин гьи вуздиз хьайитIани талукь тир хиляй имтигьанар авачиз экечIдай мумкинвал гузва.
«Лезги газет»
