Дагъустандиз мугьманвилиз атанвай Россиядин образованидин ва илимдин министр Ольга Васильева 21-ноябрдиз республикадин чирвилер гудай чIехи идарайра хьана.
Сифтегьанбурун жергеда аваз министр Каспийск шегьерда кардик квай Республикадин образованидин центрадиз фена. Адахъ РД-дин Гьукуматдин Председателдин везифаяр вахтуналди тамамарзавай Абдусамад Гьамидов, РД-дин Гьукуматдин вице-премьердин везифаяр вахтуналди тамамарзавай Екатерина Толстикова, РД-дин образованидин ва илимдин министрдин везифаяр вахтуналди тамамарзавай Шагьабас Шагьов галай.
Ольга Васильева учебный кабинетриз килигна, ада аялрихъ ва муаллимрихъ галаз суьгьбетар авуна. Министрди школа алай аямдин техникадалди таъминарнавайди къейдна ва мектебдин библиотека художественный литературадалди мадни девлетлу хъувун теклифна. Гуьгъуьнлай школадин актовый залда собрание кьиле тухвана. Министрдихъ галаз гуьруьшмиш хьун патал иниз республикадин вири муниципалитетрай педагогар атанвай.
Вичин рахунра Ольга Васильевади образованидин система еридин жигьетдай еримлу авунин асул терефар гьихьтинбур ятIа къейдна ва федеральный “ТIем акакьдай шартIар” программа тамамвилелди ва ерилудаказ кьилиз акъудунай республикадин руководстводиз сагърай лагьана.
РД-дин образованидин ва илимдин министрдин везифаяр вахтуналди тамамарзавай Шагьабас Шагьова вичин нубатдай яз республикадин образованидин месэлайриз еке фикир гунай Ольга Васильевадиз чухсагъул лагьана.
Республикадин педагогрихъ галаз гуьруьшмиш хьайи чIавуз Ольга Васильевади Москвадин электронный школади методикадин рекьяй теклифзавай цIийивилерин ва адан бинейраллаз Россиядин электронный школа тешкилунин патахъай суьгьбетна. “Са йисни зуран идалай вилик Президентди чаз Россиядин электронный школа тешкилунин тапшуругъ ганай. Ам Россиядин гьар гьи пипIе авай хьайитIани педагогдиз уьлкведин центральный паюна педагогрихъ авай хьтин мумкинвилер арадал гъунин ниятралди тешкилзавайди я. Проект 2018-йисан эхирралди кьилиз акъудда”, — лагьана министрди.
Гьа и юкъуз Ольга Васильева республикадин чIехи вузра (ДГУ, ДГТУ ва ДГПУ) хьана.
РД-дин образованидин ва илимдин министерстводин пресс-къуллугъ.
