Дагъустандин Кьилин Администрациядин телеграм-каналди хабар гузвайвал, и йикъара Украинада кьиле физвай махсус серенжемдин иштиракчийриз “Михьи рикI” фондуни нубатдин сеферда недай-хъвадай суьрсет, раб-дарман, парталар, кIвачин къапар ва хейлин маса затIар рекье туна.

Мергьяматлувилин “КIваляй рекье тур шейэр” лишандик кваз кьиле фейи серенжем фондуни Махачкъала шегьердин образованидин управленидихъ галаз санал тешкилнавай. Ана республикадин меркездин 25 мектебди, Къизилюртдин, Ленинкент, Богатыревка, Шамхал, ЦIийи Кяхулай поселокрин мектебри, спортдин “Акьраб” клубди ва Махачкъаладин аялрин 88-нумрадин бахчади иштиракна.­

Чешмеди хабар гузвайвал, 40 тонн­див агакьна суьрсет авай фура Севастополь шегьердиз рекье гьатна, анай шейэр аскерриз рекье туна.

* * *

11-декабрдиз РД-дин Кьил Сергей Меликован тапшуругъдалди Каспийск шегьердин депутатрин собранидин председатель Абдулвагьид Жаватовни Хабаровск шегьерда Дагъустан Республикадин векил Бейдуллагь Исаев, махсус серенжемда иштиракзавай дагъустанвийрал кьил чIугваз Луганскдин халкьдин республикадиз рекье гьатна. Абуру чпив гваз Дагъларин уьлкведай чкадин агьалийриз яшайишда герек къведай затIар авай фурани тухвана.

“Алай вахтунда нацистрихъ галаз кьиле физвай женгера кьегьалвилер къалурзавай хейлин ватанэгьлийри захъ галаз алакъа хуьзва. Абур гьакъикъатдани халис игитар я. Ватандин часпарар хуьзвай кьегьалриз, абурун хизанриз куьмекар гун чи буржийрикай я”, — къейднава­ А.Жаватова вичин телеграм-каналда.

Чи мухбир