Москвада 13-декабрдиз РФ-дин вице-премьер Татьяна Голиковадин  регьбервилик кваз Дагъустандин халкьдин шаир Расул Гьамзатован 100 йисан юбилей къейд авун патал гьазурвилер акунин теш­киллувилин комитетдин заседание кьиле фена. Адан кIвалахда РД-дин Кьил Сергей Меликовани иштиракна. Идан гьакъиндай редакциядиз РД-дин Кьилин алакъадин къуллугъди хабар гана.

Мярекатдал зурба юбилей къейд авуниз талукь яз республикади кьил кутазвай­ кар алай серенжемар тамамарзавай гьалдикай, гьа са вахтунда Расул Гьамза­тов ва адан ирс хуьниз талукь яз тухвана кIан­завай мярекатрикай, СМИ-ри и кардикай гегьеншдиз кхьиникайни ихтилат фена.

2023-йисуз вири уьлкведа юбилей къейдзавай Расул Гьамзатован тIвар дуьньядин гзаф уьлквейра ва миллионралди инсанриз таниш я. Чан аламаз адаз хуьруьн ва планетадин шаир лугьузвай.

“Расул Гьамзатов хьтин инсандиз, шаирдиз Россиядин Федерациядин Президент Владимир Путина еке къимет гана ва адан 100 йисан юбилей къейд авуниз талукь къарарни кьабулна. Расул Гьамзатова Ватандин культурадик кутунвай пай ва кьиле тухвай общественный кIва­лах фикирда кьуналди, чи вилик акъвазнавай везифа лап вини дережада аваз неинки Дагъустанда ва гьакI Россиядин вири регионра юбилейдин мярекатар тухун я. Ам гьар са чкада виле акьадай сувариз элкъуьрна кIанда”, — лагьана Татьяна Голиковади.

Мярекатдал доклад РД-дин Кьил Сергей Меликова авуна.

“Халкьдин шаирдин 100 йисан юбилей­ сувар хьиз кьиле тухун — им гзаф миллетар яшамиш жезвай Россия патал девлет­лу культурадин ирсиникай, машгьур шаир­дикай, вичин шиирра инсаниятдиз талукь ерийрикай (дуствиликай, муьгьуьб­­бат­ди­кай, вафалувиликай, намусдикай) кхьенвай чIалан устаддикай нубатдин сеферда малумардай лап хъсан мумкинвал я”, — лагьана С.Меликова.

Региондин Кьили Расул Гьамзатовав кIанивилелди эгечIунай, регионди кьил ку­тазвай месэладин тереф хуьнай, Россия­дин Президент Владимир Путиназ ва гьакI РФ-дин Гьукуматдиз сагърай лагьана.­

Тамамарнавай крарал акъвазуналди, Сергей Меликова къейдна хьи, властдин федеральный органрихъ галаз санал республикадин, регионрин уртах ва международный метлеб авай зурба проектар ва маса мярекатар уьмуьрдиз кечирмишун патал герек къвезвай пулдин такьатрин гьакъиндай меслятар ийизва.

Кар алай мярекатар 2023-йисан сентябрдин — октябрдин варцара Махач­къа­ла­да ва Москвада государстводин Кремл­­­дин дворецда кьиле тухуда. И вакъиадиз талукь яз музыкадинни сегьнеламишнавай “Расул Гьамзатован булахар” тIвар алай фильм гьазурда ва къалурда.

Дагъустандин Кьилин гафаралди, зурба шаирдин ирс уьлкведин регионра, къецепата машгьурунихъ еке метлеб ава. И месэлайрикай суварин федеральный пландани къейднава. ИкI, Расул Гьамзатован юбилейдиз талукь музыкадинни сегьнеламишнавай шииратдин программаяр, серенжемар, выставкаяр Азербайжанда, Узбекистанда, Къиргъизистанда ва Белоруссияда тухуда.

Россиядин  10 регионда шаирдин юбилейдиз талукьарнавай мярекатар тухунин планар туькIуьрнава. Мисал яз, Санкт-Петербургдин гьукумди шегьерда Расул Гьамзатован тIварунихъ галай парк арадал гъида. Ана “Лацу дурнаяр” стелани эцигда.

Алай вахтунда “Зи Дагъустан. Чи Расул” тIвар алаз Дагъустандин изобразительный искусстводин выставка тешкилуниз талукь месэла гьялзава. Дагъустандин изобразительный искусствойрин музейдин фондарай къачузвай экспонатрин выставка Россиядин государственный центральный музейда къалурда.

Государстводин “Расул Гьамзатован медаль” шабагьни тайинарнава. Ам культурадинни искусстводин, просвеще­ни­дин­, гуманитарный илимрин ва литературадин хилера лайихлувилер къалурайбуруз, милли культурадин ва тарихдин ирс, чIал хуьник чпин пай кутазвайбуруз гуда.

Расул Гьамзатован шикил алаз федеральный почтадин маркани акъуддайвал я.

“Расул Гьамзатов шаирдилайни виняй я. Ам советрин гзаф миллетрин литературадин титанрин жергедай сад я. Ада вичин уьмуьрдалди ва яратмишунралди Россиядин алай аямдин общество сад авуниз куьмек гузва. Чи умуми везифа Ва­тандин лап хъсан рухвайрикай къенин несилриз чирун я”, — лагьана Сергей Меликова.

Юбилейдиз гьазурвилер аквазвай гьалдикай мярекатдал Россиядин ре­къем­рин министерстводин департаментдин директор Владимир Григорьева, просвещенидин министрдин заместитель Андрей Корнеева, илимдин ва кьилин образованидин министрдин заместитель Григорий Гурова, писателрин Союздин правленидин председатель Николай Иванова лагьана.

Хийир Эмиров