РД-дин Гьукуматдин Председатель Абдулмуслим Абдулмуслимова Хасавюрт
райондин ва шегьердин медицинадин идараяр авай гьалариз къимет гана
13-декабрдиз РД-дин Гьукуматдин Председатель Абдулмуслим Абдулмуслимов Хасавюрт райондиз мугьман хьана. Ина, Нурадилово хуьре, премьер-министрдин иштираквал аваз участокдин больница ачухна.
“Лезги газетдиз” РД-дин Гьукуматдин пресс-къуллугъди хабар гайивал, азарлуяр патал 15 чарпай авай ва йикъан къене 50-дав агакьна агьалияр кьабулиз жедай шартIар тешкилнавай медицинадин цIийи идара Хасавюрт райондин кьилин больницадин къурулушдик акатзава. Ам эцигунин кIвалахриз 39 миллион манат пул чара авунвай. Больница алай мулкар авадан авуниз лагьайтIа, санлай къачурла, 9 миллион манат пул харжнава.
А.Абдулмуслимова чкадин агьалийриз яшайишдин метлеб авай цIийи идара кардик акатун мубаракна. Къейд ийин хьи, алай вахтунда Нурадилово хуьре 4 агъзурни 500 агьали яшамиш жезва.
Гуьгъуьнлай премьер-министр РД-дин здравоохраненидин министр Татьяна Беляевадихъ галаз санал Хасавюрт шегьердин кьилин больницадиз фена. Къейд ийин хьи, иниз мугьман хьун дуьшуьшдин кар тушир: шегьердин агьалийрилай и больницадин патахъай РД-дин Гьукуматдин Председателдин тIварцIел са шумуд сеферда наразивилин арзаяр атанвай.
А.Абдулмуслимов больницада авай гьалдихъ, анин коллективдихъ галаз таниш хьана, сагъламвал мягькемар хъийизвай агьалийрихъ галаз рахана.
Республикадин Гьукуматдин Председатель медицинадин идарада авай гьаларилай, санлай къачурла, нарази яз амукьна. Кьилди къачуртIа, ина бес кьадар дарманар авач, азарлубур хсуси такьатрихъ чеб сагъар хъийидай раб-дарман маса къачуниз мажбур жезва. Раб-дарман хуьзвай шартIарни, А.Абдулмуслимован фикирдалди, кутугайбур туш. Лифтерни тамамдиз къайдадик квачирди винел акъатна. Азарлубур 3 мертебадиз кIвачи-кIвачи хкаж жезвай дуьшуьшар авайди якъин хьана. Премьер-министрди ихьтин крариз эсиллагь рехъ гана виже текъведайди лагьана. Ада больницадин кьилевайбуруз авай кимивилер, энгел тавуна, арадай акъудунин тапшуругъар гана.
Хасавюрт районда авай чIавуз А.Абдулмуслимов шегьерда кардик квай перинатальный центрадизни фена. Инин кьилин духтур Алжанат Гьажиевади хабар гайивал, йисан къене центрада 5000-далай виниз аялар дуьньядал къвезва. Къейд ийин хьи, иниз неинки са Дагъустандай, гьакI Чечнядайни кIвачел залан дишегьлияр къвезва. Къунши республикадай къвезвайбурун кьадар йисан къене саки 2 агъзурдав агакьзава.
И юкъуз Хасавюртда А.Абдулмуслимова райондин, шегьердин администрацийрин векилрин иштираквални аваз совещание кьиле тухвана. Адан сергьятра аваз премьер-министрди Хасавюрт шегьердин кьилин больницадин бинедал аялрин цIийи больница эцигун тапшурмишна. И месэла республикадин здравоохраненидин министерстводи экономикадин ва мулкар вилик тухунин министерстводихъ галаз санал гьялдайвал я.
«Лезги газет»
