28-майдиз “Лезги газетдин” редакцияда писатель, карчи, физикадинни математикадин илимрин кандидат, общественный деятель Мариф Жамединович Къадимован “Тарни тIвар” ва “Жизни живые метки” (урус ва лезги чIаларал акъуднавай) ктабрин презентация “элкъвей столдин” жуьреда кьиле фена. И ктабар алатай йисан эхирра Махачкъалада чапдай акъатна.
Мярекатда “Лезги газетдин” кьилин редактор Мегьамед Ибрагьимова, редакциядин къуллугъчийри, лезги халкьдин илимдин ва медениятдин деятелрин Ассоциациядин кьил Мугьаммад-Букар Гьамидуллаева, филологиядин илимрин кандидат, Махачкъаладин 61-нумрадин мектебдин директордин заместитель Халидин Эльдарова, МЛНКА-дин председатель Пакизат Рагьимхановади, диндин рекьяй алим Сулейман Тагъибегова, адвокат Мурад Аллагьвердиева, общественный деятель, ашукь Алихана, “Ким” тешкилатдин регьбер Эмран Гьуьсейнова, карчи Замир Къадимова, Махачкъаладин 59-нумрадин мектебдин лезги чIалан муаллим Репия Къарибовади ва и мектебда кIелзавай аялри иштиракна.
М.Къадимоваз ктабар мубарак авуналди, мярекат “Лезги газетдин” кьилин редактор М.Ибрагьимова ачухна. Ада иштиракчияр ктабрин автордихъ, абура гьатнавай эсеррин асул метлебдихъ, авторди халкь патал ийизвай крарихъ галаз танишарна.
М.Къадимова вичин рахунар халкьдин бязи месэлайрилай башламишна.
— Гьар патахъай четин, гзаф йисара гьялиз тежезвай месэлаяр кIватI хьанва, — лагьана ада. — Чавай я сиясатдин, я маса “нетижалу такьатар” агудиз, кардик кутаз хьанвач. Дуьнья йигин еришралди виликди физва, иллаки информациядинни технологийрин рекьяй. Кьили кIвалахзавай инсанри, чпи чеб кьунвай халкьари и кардикай менфят къачузва. Чавай чи халкьдин, иллаки къвезвай несилдин кьиле фикиррин «цIийи чешне» тваз алакьайтIа, нетижаярни жеда. Сад лагьайди, аял мектебда амаз (7-8 кл.) вичин уьмуьрдив проектдив хьиз эгечIиз вердишарун лазим я.
Мультимедийный проектдикай менфят къачуналди, мярекатдин сергьятра аваз Мариф муаллимди иштиракчияр патал “Халис инсан хьухь!” лишандик кваз ачух тарсни кьиле тухвана. Къейд ийин, и тарсунин план ктабдани гьатнава. Ам иллаки жегьилар патал хъсан метлеб авай тарс я.
Мярекатдал шаир ва публицист М.Жалилова, Х.Эльдарова, М.-Б.Гьамидуллаева, Н.Ибрагьимова, С.Тагъибегова, ашукь Алихана, П.Рагьимхановади, Э.Гьуьсейнова, адвокат Мурад Аллагьвердиева, и цIарарин авторди “Тарни тIвар” ва “Жизни живые метки” ктабрикай чпин фикирар лагьана, автордиз гьикаятдин рекье къачунвай камар мубаракна; хайи чIал хуьнин, несилрал агакьарунин месэлаяр веревирдна.
Лезги чIалан муаллим Р.Къарибовади вичихъ галаз ученикарни гъанвай. Абуру Мариф Къадимован ктабра гьатнавай бязи камаллу келимаяр, эсерар хуралай кIелна.
Къейд ийин, Мариф Къадимов лезги интеллигенциядин сейли векилрикай сад я. М.В.Ломоносован тIварцIихъ галай МГУ куьтягьнавай физик-математик ятIани, ада вичин гзаф терефрин бажарагъ халкьдиз са гьихьтин ятIани хийир гунин рекьера ишлемишзава. Махачкъалада кьиле физвай лезги мярекатра ада гьамиша иштиракзава. Адан къелемдикай хкатай ктабар кIелчийри хушдиз кьабулуни ам насигьат квай гьикаяяр кхьинин устад тирди субутзава.
Ктабрикай идалай вилик “Лезги газетдин” чинриз макъалаярни акъатнай. Адан эсеррикай чи хейлин писателри хъсан фикирар лагьанва. Автордин ибретлу гьикаяйрин асул метлеб халкьдин арада гьуьрмет, ихтибар мягькемарун я.
Эхирдай М.Къадимова мярекатдин иштиракчийриз сагърай лагьана.
К.Къалажухви
