25-май филологдин югъ я
Инсанар ва абуру тамамарзавай пешеяр жуьреба-жуьре я. Садбуру пешеяр дуьшуьшдай, муькуьбуру рикIин эмирдалди хкяда.Пешеяр хкягъуникай рахадайла, заз инал Карл Маркса лагьай келимаярни гъиз кIанзава: “Уьмуьрда вичин пеше дуьз хкягъиз тахьайди виридалайни бахтсуз кас я”. ГьакI хьайила, къе чаз вичикай чи газет кIелзавайбуруз куьрелди суьгьбет ийиз кIанзавай Кьасумхуьруьн 2-нумрадин юкьван школадин дидед чIалан ва литературадин муаллим Пирис Эмировна Нежведилова бахтлу кас яз гьисабиз жеда.
— За муаллимвилин пеше дуьшуьшдай ваъ, рикIин эмирдалди хкягъайди я. И пешедин иеси хьунал къе за шадвал, дамахни ийизва, — лугьузва Пирис Нежведиловади. — Школада гъвечIи классра кIелзавай йисарилай зи рикIе муаллим хьунин къаст авай.
Сифте нубатда зун муаллимвилин четин, гьа са вахтунда гзаф гьуьрметлу пешедал ашукьарайди зи рагьметлу дах я. Яргъал йисара школада акьалтзавай несилдиз дерин чирвилер гайи зи дах Эмир Шабанован тIвар къени гзафбуру гьуьрметдивди рикIел хкизва. И кардал за дамахзава.
Вичин везифаяр намуслудаказ кьилиз акъудзавай, кар алакьдай, бажарагъдин пай ганвай инсанар акурла, лугьунни ийида: “Аллагьди ганвай пай я”. Ихьтинбурукай сад Пирис Эмировна я лагьайтIа, зун ягъалмиш жедач. Ада вичин дерин чирвилералди, намуслу зегьметдалди, иллаки вири уьмуьрдин кар яз хкянавай муаллимвилин пешедал ашукь хьуналди ва тербияламишунин устадвилелди школадин муаллимрин, аялрин ва абурун диде-бубайрин патай гьуьрмет къазанмишнава.
Пирис Эмировнадин пешекарвал къачунин рехъ масадбурулай тафаватлу туш лагьайтIа жеда: ада 1978-йисуз Кьасумхуьруьн 1-нумрадин юкьван школа лап хъсан къиметар аваз акьалтIарна. ГъвечIи чIавалай рикIе авай мурад кьилиз акъудун патал дагъви руш Дагъустандин госуниверситетдин филологиядин факультетдин урус ва Дагъустандин чIаларин отделенидик экечIна. 1984-йисуз анаг акьалтIарна. Жегьил пешекарди вичин зегьметдин рехъ 1984-йисуз Кьасумхуьруьн 2-нумрадин юкьван школада дидед чIалан ва литературадин муаллимвиле кIвалахунилай башламишна.
Пирис Нежведиловади университетда къачур чирвилер кIвалахда ишлемишна ва деринарна. Тежрибалу муаллимривай тарс гунин, аялрихъ галаз кIвалах тешкилунин сирер чирна. Вири къуватар желбна, зегьмет чIугуналди, школадин коллективдин патай гьуьрмет къазанмишна.
Пирис Нежведиловади гьа са школада муаллимвиле кIвалахиз ингье 37 йис я.
Са шумуд муаллимди адакай икI лагьана: “Чаз Пирис Эмировна гьакъисагъвилелди кIвалахзавай, агалкьунар къазанмишзавай муаллим яз чида. Адан чирвилер гунин, тербияламишунин кIвалахдин ери кьакьанди я. Тежриба авай пешекар ятIани, ам вичин устадвал хкажунал датIана машгъул жезва. Пирис Эмировна вичин пешедин халис устад я”.
П.Нежведиловадин намуслу зегьметди, ада гъавурда аваз тухузвай кIвалахди хъсан нетижани гузва. ИкI, ада чирвилер ва тербия гайи са шумуд касдикай чIехи дережайрин руководителар, хъсан пешекарар — духтурар, муаллимар, инженерар… хьанва. Ада чирвилер гузвай гадайрини рушари гьар йисуз райондин ва республикадин олимпиадайра кIвенкIвечи чкаяр кьазва.
Тежрибалу муаллимди школада дидед чIалан ва литературадин хъсан кабинетни тадаракламишнава.
Алай вахтунда ада 6-классдиз регьбервал гузва. КIелунин ва ахлакьдин жигьетдай класс хъсанбурун жергеда хьун, гьелбетда, тежрибалу муаллимдин бегьерлу кIвалахдин нетижа я.
Са шумуд йисуз Пирис Эмировна “Йисан муаллим” ва “Виридалайни хъсан классдин руководитель” конкурсрани гъалиб хьана.
2010-йисалай кьилин категориядин муаллим тир П.Нежведиловадиз “РФ-дин образованидин гьуьрметлу работник” лагьай тIвар, райондин образованидин управленидин ва школадин дирекциядин патай гьуьрметдин грамотаяр ганва.
Пирис Эмировнадихъ вичин рикI алай кIвалах гележегдани аферин алаз тамамардай мягькем сагъламвал ва къуватар хьун чи мурад я.
Хазран Кьасумов
