Алатай саласадиз Росгвардиядин Дагъустанда авай Управленида ведомстводинди тушир охранадин (ВВО) кIвалахдин алатзавай йисан нетижаяр кьуниз талукьарнавай пресс-конференция кьиле фена. Анал тероргандин начальникдин заместитель, полициядин полковник Навруз Гьуьсейнова республикадин СМИ-рин векилриз подразделениди санлай кьилиз акъудзавай везифайрикайни (иник кьетIен важиблувал авай объектар, общественный къайдаяр, жавабдар къуллугърал алай ксар, автотранспорт ва мсб. хуьн акатзава), цIийи йис патал вилик эцигнавай месэлайрикайни лагьана. Адет хьанвайвал, журналистрин са жерге суалризни жавабар гана.
Малум хьайивал, ВВО-дин къуллугъчийрин 14 экипажди гьар юкъуз региондин мулкара хатасузвал таъминарунин кIвалах кьиле тухузва. Кьилин везифадилай — хуьзвай объектра ва агьалийрин хсуси кIвалерани квартирайра чуьнуьхунар арадал атуниз рехъ тагунилай гъейри, ведомстводинбур тушир охранадин къуллугъчийри тахсиркарвилерин вилик пад кьуниз талукьарнавай серенжемрани иштиракзава. Къенин юкъуз абуру республикадин, санлай къачурла, 4 агъзурдалай виниз жуьреба-жуьре объектар, квартираяр ва транспортдин такьатар, чпин гуьзчивилик кутуналди, хуьзва. Нетижаяр кьазвай девирда подразделенидин къуллугъчийри административный ва уголовный законодательство чIурунай шак физвай 541 агьали кьуна. Алай йисуз абуру республикада гзаф кьадар инсанрин иштираквал аваз (массовый) кьиле фейи 38 мярекатда общественный къайдаяр ва хатасузвал хуьн таъминарна. Хуьзвай объектра угъривал авур дуьшуьшар хьанач.
Навруз Гьуьсейнов подразделениди, терроризмдин вилик пад кьунихъ элкъуьрна, кьилиз акъудзавай кIвалахдални акъвазна. Кьилди къачуртIа, ведомствойрин уртах комиссийрихъ галаз санал и жигьетдай школаяр кIелунин цIийи йисаз гьазур хьун ахтармишайди къейдна. Малум хьайивал, региондин образованидин 2570 идарадикай 1245 ВВО-дин техникадин такьатрин куьмекдалди хуьзва.
Офицерди къуллугъчийри чпин везифаяр баркалла алаз, чандилайни гъил къачуна, кьилиз акъудзавайди, гзафбурун женгинин рехъ жуьрэтлувилин чешне тирди къейдна. Мисал яз, Россиядин Игитвилин тIварцIиз (кьейидалай кьулухъ) лайихлу хьайи полициядин лейтенант, ВВО-дин Каспийскдин отделдин къуллугъчи Мегьамед Нурбагандован къамат, алай йисан июндин вацра кьиле фейи вакъиаяр (ана тафаватлу хьайи 7 къуллугъчидиз государстводин шабагьар гана) рикIел хкана.
Журналистри гайи са жерге суалрик ВВО-диз къуллугъчияр кIвалахдал кьабулуниз талукьдини квай. Полициядин полковникди къейд авурвал, аниз чпелай кар алакьдай, физический ва сагъламвилин жигьетдай мягькем, са гафуналди, милли гвардиядин кьушунрин къуллугъчидин везифаяр кьилиз акъудиз жедай жегьилар кьабулзава.
Санлай йисан нетижаяр кьун яз, Н. Гьуьсейнова 2024-йис патал ВВО-дилай вилик эцигнавай везифаяр кьилиз акъудиз алакьайди къейдна. Алукьзавай цIийи йисузни вилик эцигнавай месэлаяр вини дережада аваз кьилиз акъудунихъ инанмишвал къалурна.
Рагнеда Рамалданова
