Чи йикъара ашукьвилин сеняткарвал еке алакьунар аваз давамарзавайбурун жергедик акатзавай ашукь Айдунан тIвар Лезгистандин вири пипIера сейли я. ЦIийи йисан вилик ашукь Айдуна вирироссиядин музыкадин “Культмост.Ярославль.Этно” фестивалда 1-чка кьуна. Ярославль шегьерда кьиле фейи и чIехи мярекатда музыкадин 200 алат язавай 300 кьван устадри иштиракна. Зурба мярекатда чи ашукь ихьтин дережадиз лайихлу хьун вирибурук дамах кутадай кар я. Конкурсдин жюридин векилри адалатлудаказ къимет гана.
Фестивалдин сад лагьай пай онлайн жуьреда кьиле фена. Халкьдин музалатар гвай устадриз тайин тапшуругъар гузвай. Ашукь Айдуназ “ОТТА” оркестрдин симфониядин аваз чуьнгуьрдалди ягъунин тапшуругъ ганвай. Пакадин юкъуз Айдун Мегьамедова вичин стха Рамазанахъ галаз (ада синтезатор язава) ганвай тапшуругъ тамамарна. Гуьгъуьнлай лап хъсан 15 устаддик акатнавайдакай хабар гана. ИкI, адаз Ярославлдиз атун ва ана фестивалдин эхиримжи паюна иштиракун теклифна.
— Вун ана гьикI кьабулна? — суал гана за Айдун Мегьамедоваз.
— Лап хъсандиз. Рехъ-хвал, тIуьн-хъун, мугьманхана — ибур вири чпин харжидихъ тешкилна. Сифте юкъуз вирибуруз репетицияр хьана. 16-декабрдиз (2022-йисан) фестивалдин асул пай кьиле фена. 17-декабрдиз шабагьар вахкана ва чIехи гала-концерт кьиле фена.
Фестивалдин нетижада гъалиб хьайи Айдун Мегьамедоваз 150 агъзур манатдин кьадарда пулунин пишкеш, чуьнгуьр хурал кьунвай ашукьдин кIалубда авай кубок, диплом ва “Мостурфлот” тешкилатдин патай яратмишунрин круиздин сертификат, маса къиметлу савкьатар гана.
Финалдин паюна ашукьди залда ацукьнавайбуруз чуьнгуьр лезги халкьдин рикI алай музалат тирдакай, несилрилай несилрал къвез, и алатди вири девирра чи мел-мехъер, шадвилин мярекатар гурлу ийизвайдакай авур ихтилатдихъ вирибуру итиждивди яб акална.
— Виридалайни хушдиз зун Ярославлда авай чи ватанэгьлийри къаршиламишна, — давамарзава ашукьди ихтилат. — Ярославлдин лезги автономиядин регьбер Васиф Гьасановаз, Жанлат Абдуллаеваз за иллаки чухсагъул лугьузва. Фестивалдин нетижада зун гъалибчи яз малумарайла, залай гзаф залда ацукьнавай чи ватанэгьлийриз хвеши хьана.
Чаз малум тирвал, мел-мехъер чуьнгуьрдин ванцелди гурлу авунилай гъейри, Ашукь Айдуна вичин пешедин рекьяй хейлин конкурсрани фестивалра идалай виликни агалкьунралди иштиракна. Ада лезги чуьнгуьрдин гьунарар гьатта къецепатан уьлквейрани къалурзава. 2015-йисуз Дербентдин 2000 йисан юбилейдихъ галаз алакъалу яз Парижда кьиле фейи концертда ада вичин регьбервилик квай “Самурдин сесер” фольклордин коллективдихъ галаз ягъай манийри, макьамри вирибур тажубарнай. 2011-йисуз ада Азербайжанда кьиле фейи ашукьрин фестивалдани иштиракна.
Халкьдин яратмишунар, меденият хуьнин ва вилик тухунин карда лайихлувилерай 2012-йисуз Дагъустандин медениятдин министерстводи кардик кутур “Дагъустандин руьгь” премиядин сад лагьай лауреатни ашукь Айдунакай хьуни устаддин алакьунар вини дережадинбур тирди субутзава. 2017-йисуз ам “Лезги сес” конкурсда-фестивалда гъалиб хьана. 2018-йисуз Башкирияда кьиле фейи вирироссиядин халкьдин яратмишунрин фестивалдани ада чуьнгуьрдалди авазар тамамарна.
Адавай эверай мярекатриз, межлисриз ва фестивалриз тефена акъвазиз жедач. Заз чиз, им халисан ашукьдиз хас къилих я. Чи мурад устаддихъ мадни зурба агалкьунар хьун я.
Алава къейд. Айдун Мегьамедов 1968-йисуз Ахцегь райондин Фиярин хуьре ашукь Ширинан хизанда дидедиз хьана. Айдун хьиз, муькуь стхаярни бубадин рекьяй фена: музыкадин жуьреба-жуьре алатар язава, авазралдини манийралди инсанрин гуьгьуьлар шадарзава.
К. Ферзалиев
