ЦIийи йисан вилик Махачкъалада, “Дагъустан” РИА-дин конференц-залда, Росгвардиядин Дагъустан Республикада авай Управленидин начальникдин везифаяр вахтуналди тамамарзавай полковник Игорь Магкеев журналистрихъ галаз гуьруьшмиш хьана. Асул гьисабдай 2021-йисан нетижаяр кьуниз талукьарнавай пресс-конференциядал ада, талукь девирда кьилиз акъуднавай кIвалахдикай хьиз, цIийи йисуз вилик акъвазнавай везифайрикайни куьрелди лагьана, журналистрин хейлин суалризни жавабар гана…
Малум хьайивал, алатай йисуз Росгвардиядин территориальный Управленидин къуллугъчийри женгинин ва къуллугъдин рекьяй 3000-далай виниз месэлаяр гьялна, гьа гьисабдай яз общественный къайдаяр ва хатасузвал хуьниз талукь серенжемар кьилиз акъудна. Кьилинбурун жергедай яз И.Магкеева Гъалибвилин йикъаз, РФ-дин Госдумадиз сечкияр кьиле тухузвай вахтунда хатасузвал таъминаруниз талукьбур ва масабур къалурна. Подразделенийрин къуллугъчийри региондин амай къурулушра зегьмет чIугвазвайбурухъ галаз санал тартибда аваз ва чпин хиве авай везифаяр жавабдарвилелди кьилиз акъудунин нетижада регионда гьалар пайгардик кваз хуьз алакьна. Идалайни гъейри, Дагъустандин МВД-дин къуллугъчийрихъ галаз санал тахсиркарвал авунай шак физвай 10 кас кьуна, яракьар, наркотикар вахчуна ва икI мад.
— Лицензийриз талукь ихтиярар гудай центрадин (ЦЛРР) подразделенийри кьиле тухузвай кIвалах кьилди рахуниз лайихлу я. ГьикI хьи, чпихъ 120 агъзурдалай виниз яракь (единица) авай 90 агъзурдалай виниз агьалияр и подразделенийри чпин гуьзчивилик хуьзва. И жигьетдай нетижаяр кьазвай вахтунда 20 агъзурдалай виниз ахтармишунар кьиле тухвана. Жавабдар къуллугърал алай ксариз талукь яз административный 12 протокол туькIуьрна. Жермейрин кьадарди 551 агъзур манатдилай виниз тешкилна, — къейдна Игорь Магкеева.
Мярекатдал ведомстводинди тушир охранадин къуллугъчийрин кIвалахдин нетижайрихъ галазни танишарна. ИкI, алатай йисуз абуру икьраррин бинедаллаз 2080, гьа гьисабдай яз милли гвардияди мажбуридаказ хуьн лазим тир 28 объектдин хатасузвал таъминарна. Ихтиярар чIуруниз талукь 64 дуьшуьш дуьздал акъудна. Абуру хуьзвай объектра чуьнуьхунар хьанач.
Игорь Магкеев 2022-йисан планрикай, кьилин везифайрикайни куьрелди рахана. Абур терроризмдихъ ва экстремизмдихъ галаз женг чIугун, общественный къайдаяр ва хатасузвал таъминарун, государстводин важиблу объектар хуьн, Роосиядин Федерациядин сергьятар хуьзвай къуллугъриз куьмек гун ва масабур я.
Рагнеда Рамалданова
