ЦIийи йисан вилик квай йикъара Дербент шегьердин агьалийриз яшайишдин рекьяй къуллугъдай Комплексный центрада, ина къуллугъар агакьарзавай аялрин иштираквал аваз, са жерге мярекатар кьиле тухун, иниз жуьреба-жуьре тешкилатра ва хилера зегьмет чIугвазвай векилар атун, аялриз ЦIийи йис мубарак авун хъсан адетдиз элкъвенва. Нубатдин сеферда кьиле тухвай мярекатрал 500-далай виниз аялриз пишкешар гана.
ГъвечIи аялар патал суварин сад лагьай мярекат Центрада яшайишдин рекьяй кIвалера ва хизанра аялрив къуллугъар агакьардай отделенидин заведующий Гьумай Велиевади кьиле тухвана. Ада мугьманриз ва аялриз сувар мубаракна, абурухъ сагъвал, кIелунра агалкьунар хьана кIанивилин келимаяр лагьана.
Аялриз сувар багъишиз, Дербент шегьердин аялрин ва жаванрин яратмишунрин дворецда вердишвилер къачузвайбур — “Бахтлу аялвал” ансамбль атанвай. Гуьрчег пек-партал алайбуру кIватI хьанвайбурун гуьгьуьлар хкажна. Виридалайни рикIел аламукьдай легьзеяр Аяз Буба ва Живедин Ханум атунихъ галаз алакъалубур хьана. Аялри абур атун сабурсузвилелди вилив хуьзвай. БицIекрив махунихъ агъаз тазвайбур, абурун мурадар кьилиз акъудзавайбур Аяз Бубани Живедин Ханум я эхир. Аялрив пишкешар вахкудайла, абурун шадвилихъ кьадар авачир.
Дербентдин Комплексный центрадин кьиле авай ксаривай ва яшайишдин къуллугъар агакьарзавай, ина спонсоррин куьмек галаз тешкилнавай суварин мярекатар кьиле тухунал ва пишкешар паюнал желбнавай ксаривай, вири мярекатар хъсандиз кьиле тухуз, аялрин рикIера сирлу алемдихъ ва аламатдин крарихъ инанмишвал хуьз алакьна.
Центрадин директор Екатерина Колесниковади ва идарадин коллективди мергьяматлувилин серенжем кьиле тухунай къени къилихрин ва чарадан тIалдикай гьамиша хабар кьадай чIехи рикI авай инсан — “ДЗИВ” ОАО-дин генеральный директор Мегьамед Садулаеваз (аялрив пишкешрин 400 набор агакьарунай), тIимил агьвал авай хизанрай тир аялар патал датIана жуьреба-жуьре суварар тешкилиз, датIана спонсорвалзавай, “Панорама” супермаркетрин сетдин регьбер Тимур Гьамзаеваз (аялрив пишкешрин 50 зимбил агакьарунай), вичин тIвар раиж тавур мад са касдиз, шегьердин собранидин депутат Айваз Алихановаз (аялрив пишкешрин 20 зимбил агакьарунай), РД-дин нотариальный палатадин президент Шамсутдин Жалаеваз (тIимил агьвал ва дарда авай 41 хизанда авай аялриз куьмек гунай) рикIин сидкьидай сагърай лагьана. Санлай къачурла, ЦIийи йисан суварин мярекатрал 500-далай виниз аялрив пишкешар агакьарна. Абурун арада четин шартIара гьатнавай, гзаф аялар, инвалид аялар авай, тамам тушир хизанра чIехи жезвай, кьилел буба ва я къаюмвалдай кас аламачир, гьакIни Сириядай, Иракдай хканвай аялар ава.
«Лезги газет»
