Дагъустанда Россиядин Федеральный антимонопольный къуллугъдин руководитель Игорь Артемьев мугьманвиле хьана. 3-сентябрдиз адахъ галаз республикадин Кьил Владимир Васильев гуьруьшмиш хьана. Идан гьакъиндай чи газетдиз РД-дин Кьилин ва Гьукуматдин Администрациядин пресс-къуллугъди хабар гана.
Дагъустандин чилел мугьман тебрик авуналди, Владимир Васильева хъсан нетижаяр арадал гъанвай саналди тир кIвалах тухунай адаз сагърай лагьана.
“Дагъустандиз пешекаррин са десте рекье тунай куьн пара кьадар сагърай. Ида чаз республикада гьалар виле акьадайвал дегишардай мумкинвал гана. Дагъустандин тарихда сифте яз чина, чIуру ниятар аваз, гаф-чIал саднавай десте арадал гъунин кьве дуьшуьш дуьздал акъудна. Абуруз талукь яз уголовный делояр къарагъарнава, алай вахтунда силис тухузва. Куь ведомстводин патай куьмек агакьначиртIа, чун патал адетдинди тушир и кардал кIукI гъиз жедачир”, — лагьана, кьилди къачуртIа, республикадин Кьили.
Идалайни гъейри, Владимир Васильева малумарайвал, регионда госзакупкайрин рекьяй конкуренциядин юкьван дережа хкаж жезва. И карда иштиракзавайбурун кьадар 2017-йисан 1,4-далай 2018-йисуз 1,6-дав агакьна артух хьана. Гъилевай йисан 7 вацра лагьайтIа, и делил 1,9-дав агакьна. Ада къейд авурвал, имни сергьят туш.
Хъсанвилихъ жезвай дегишвилериз талукь статистикадин делилрихъ галаз алакъалу месэла ачухарун давамарун яз, Игорь Артемьева лагьана: “Гьукумдин органри къанунсузвилериз рехъ гунин кьадар куь регьбервилик кваз 70 процентдин агъуз аватна. ФАС-да кIвалахзавай 15 йисан девирда заз ихьтин рекъемар и чIавалди гьич садрани акурди туш. Ихьтин дережайрив агакьун патал, гьелбетда, коррупциядиз акси, къуватдин къурулушрихъ галаз алакъалу ва экономикадиз талукь чIехи серенжемар кьиле тухвана. ФАС-дин рекьяй ина виликдай аваз хьайи гьалар яваш-яваш арадай акъудзава. Им хъсан кар я”.
Россиядин ФАС-ди, сад-садахъ галаз алакъалу чи вири къурулушри тухвай кIвалахдин нетижада чалай здравоохраненида ва рекьерин майишатда, чIуру ниятар аваз, гаф-чIал сад авунвай дестейриз талукь делояр къарагъариз ва бюджетдиз къвезвай пулдин такьатрин кьадар артухариз алакьна. Месела, са муькъуьз талукь торгар кьиле тухудай чIавуз 500 миллион такьатар кьенятна. Нетижада чалай,гьа гьисабдай куь ведомстводин кIвалахдин нетижадани, алай йисуз целди таъминарун патал 1,7 миллиард манат пулдин такьатар чара ийиз алакьна. И кIвалахди хъсан нетижани гузва, — 500 агъзур кас агьалийри йисан эхирра цин ери хкаж ва адан кьадар артух хьанвайди гьиссда. Куь ведомстводи тухузвай кIвалах чун патал важиблуди я”, — къейдна Владимир Васильева.
Вичин патай яз, Игорь Артемьева малумарайвал, ам кьиле авай къуллугъ ФАС-диз ва адахъ галаз алакъалу хилериз талукь месэлайрай республикадиз куьмек гуз ва чарасузвал арадал атай дуьшуьшра месэлаяр гьялун патал пешекарар ракъуриз гьазур я.
Гуьруьшдал санал кIвалахунин маса терефриз, гьакIни РФ-дин ФАС-дини РД-дин Гьукуматди виликдай кутIуннавай икьрардин сергьятра аваз серенжемар кьилиз акъудуниз талукь ва са жерге маса месэлаярни веревирдна.
Гуьруьшда РД-дин Гьукуматдин Председатель Артем Здуновани иштиракна.
«Лезги газет»
