Дагъларин уьлкведин меркезда терроризмдиз акси женгина рейсадвилин йикъаз талукьарнавай мярекат кьиле фена. Ана Дагъустан Республикадин Кьил Владимир Васильева, РД-дин Гьукуматдин членри, къайдаяр хуьдай органрин къуллугъчийри, жегьилрин тешкилатрин векилри ва масабуру иштиракна. Идан гьакъиндай “Лезги газетдиз” РД-дин Кьилин ва Гьукуматдин администрациядин пресс-къуллугъди хабар гана.
Мярекатдив эгечIдалди вилик кIватI хьанвайбуру къайдаяр хуьдай органрин телеф хьайи къуллугъчийриз хкажнавай мемориалдал цуьквер эцигна. И юкъуз гьакI РД-дин жегьилрин крарин рекьяй министерстводи ва Махачкъала шегьердин спортдин, туризмдин ва жегьилрин крарин рекьяй комитетди “Жегьилар террордиз акси я” акцияни тешкилнавай. И мярекатни меркездин майдандал кьиле фена. Студентри, волонтерри ва жегьилрин организацийрин активистри, жергейра акъвазна,”Террордиз — ваъ” гафар арадал гъана ва цавуз, террористрин гьерекатрик телеф хьайи инсанар рикIел хкун яз, шарар ахъайна.
Идахъ галаз сад хьиз, урусрин драмтеатрдин дараматдин къаншарда шикилар чIугунай аялрин конкурс тешкилнавай. Театрдин майдандин вилик, 1999-йисуз Ватан хвейи ксарин иштираквални аваз, концертни кьиле фена.
«Лезги газет»
