Махачкъаладин международный “Уйташ” аэропортуни Уьзбекистандин ва Центральный Азиядин виридалайни къадим шегьеррикай садахъ — Бухарадихъ галаз гьавадай алакъа кардик кутунва, хабар гузва компаниядин информациядин къуллугъди.
20-январдилай башламишна, гьар хемис юкъуз “Red Wings” авиакомпанияди “Sukhoi Superjet 100” самолетра аваз Махачкъаладай Бухарадиз рейсер тамамарзава. Кьве шегьердин арада лув гунин вахт 2,5 сятиниз барабар я.
Къейдна кIанда, алай йисан 15-январдилай башламишна, Уьзбекистандиз къвезвай вири пассажиррив (2 йис тамам тахьанвай аялар галачиз) коронавирус квачирди тестикьарзавай ва уьлкведиз агакьдалди 48 сятинилай фад тушиз вахканвай ПЦР-тест хьун лазим я.
Дагъустандинни Уьзбекистандин арада алакъадин расписание агъадихъ галайди я: Махачкъаладин аэропортунай самолет нянин сятдин 5 жез 10 декьикьа амайла экъечIда; Бухарадай Махачкъаладиз самолет йифен сятдин 11 жез 25 декьикьа амайла рекье гьат хъийида.
«Лезги газет»
