Дагъустан Республикада 14-17 йисарин яшда авай жаванриз ва жегьилриз финансрин рекьяй савадлувилин ва карчивилин дибар чирдай курсар кьиле фена. Проект “ГъвечIи ва юкьван карчивал, карчивилин жигьетдай кьилдин ксарин теклифрин тереф хуьн” милли проектдин сергьятра аваз уьмуьрдиз кечирмишна.
Жаванриз ва жегьилриз финансрин рекьяй савадлувилин ва карчивилин дибар чирун патал кьиле тухвай курсарин тешкилатчийри 30-ноябрдиз “Мирмол” изданидин майдандал кьиле фейи пресс-конференциядал авунвай кIвалахдин нетижаяр кьуна. Журналистрин вилик «Карчивилин фабрика» проектдин векил Осман Дадаев ва РД-дин карчивилиз куьмек гунин Центрадин кьил Иса Мигьитинов рахана.
Осман Дадаева суьгьбет авурвал, и проектдин сергьятра аваз жегьил карчийриз куьмек гун патал туькIуьрнавай жуьреба-жуьре программаяр кьилиз акъудиз вад йисалай гзаф вахт хьанва.
“Абурун жергедай яз 14-17 йисарин яшара авай жаванар ва жегьилар патал фикирда кьунвай, абуруз карчивилин рекьяй вердишвилер гун патал гьазурнавай, республикадин ирид мектебда кьиле тухвай курсарикай лугьуз жеда. ИкI, спикерри аялриз маркетинг, продуктдин упаковка вуч ятIа, хсуси бизнес гьикI арадал гъидатIа, гьадакай суьгьбетна. ГьакIни карчивилин рекьяй олимпиада тешкилна. Адан сергьятра аваз аялри карчивилин кIвалахдин юридический ва финансрин терефар чир хьуниз, адетдинди тушир жуьреда кьатIунуниз ва фикир авунин дуьзвилиз талукь месэлаяр гьялна”, — суьгьбетна проектдин кураторди.
Алай йисуз олимпиадада мектебра кIелзавай 4 агъзур аялди иштиракна. Финалдиз 300 кас акъатна, абурукай 6 кас гъалиб хьана. Осман Дадаева малумарайвал, гъалибчийриз къиметлу пишкешар — ноутбукар, планшетар ва smart-сятер гана. Адан гафаралди, аялри “Бизнесдин месэлайрал машгъул хьуниз мектебра кIелзавай абуру ийизвай итиж, малум хьайивал, екеди, абурун вилик и жигьетдай акъвазнавай тек са четинвал са тIимил кичI хьуникай ибарат я. И кичI абурук хизанра, диде-бубайри кутазва жеди, яни абуру мукъаятвалзава”, — къейдна О.Дадаева. Гьа са вахтунда Иса Мигьитинова алава хъувурвал, карчивилиз куьмек гунин Центради республикадин гъвечIи ва юкьван карчивилин субъектрин кIвалахдиз вири патарихъай куьмек гун патал кIвалах активнидаказ кьиле тухузва. И рекье асул хилер информациядин ва меслятрин къуллугъар авуникай, маркетингдин ва юридический рекьерай куьмек гуникай ибарат я. Центрадин пешекарри гьам гъвечIи ва юкьван бизнесдин векилар, гьамни хсуси бизнес арадал гъиз кIанзавай ксар патал итижлу жуьреба-жуьре месэлайрай чирвилер гудай курсар, мастер-классар тешкилда.
“Бизнесди яшайишдинни экономикадин месэлаяр гьялунин, кьилди къачуртIа кIвалахдин цIийи чкаяр арадал гъунин, бейкарвилин дережа агъузарунин, пешекар кадрияр гьазурунин карда еке роль къугъвазва. Экономика патал муракабди тир алай девирда чи центр республикада бизнес еримлу авунин месэладиз жезмай кьван гзаф фикир гуз алахъзава”, — къейдна И.Мигьитинова.
Карчивилин месэладикай суьгьбет давамарун яз, ада малумарайвал, Дагъустандин 17 карчиди международный майданра алишвериш ийиз башламишнава. Иса Мигьитинован гафаралди, Центради вири документар, гьа жергедай яз презентациядиз талукьбурни дуьздаказ туькIуьрунихъ, маркетплейрихъ (международный алишверишдин майданар) галаз рахунар кьиле тухунихъ галаз алакъалу вири месэлаяр вичел къачузва. Дагъустандин карчийри маркетплейсра мукьвал-мукьвал халкьдин художественный сеняткарвилин ва я чи республикадиз хас маса метягьар майдандиз акъудзава. Карчийриз куьмек гунин и къуллугъ Центради пулсуздаказ тамамарзава. “Ягъалмиш тахьун патал чна сифтедай карчидиз кьилди къачур майданра (Ozon, Wildberries ва икI мад) и ва я маса шейиниз талукь делилар, яни адахъ авай игьтияж, виридалайни гзаф маса къачузвай чкаяр, кьадар…) ахтармишун теклифзава. Анжах дуьздаказ хкянавай майданди дурумлу къазанжияр, агалкьунар гъида. Чи пешекарри алишверишдин майданар ахтармишзава ва карчидиз виридалайни къулай рекьер теклифзава”, — алава хъувуна Центрадин кьили.
Жасмина Саидова
