28-ноябрдилай Махачкъаладин агьалийривай ва мугьманривай ракьун рекьин “Дербент — агъзур хкетрин шегьер” цIийи сейрдиз физ жезва. Дагъустандин меркездай экскурсияр кьиле тухузвай чкадив абур шегьеррин арада къекъвезвай поездри агакьарда.
Са жерге къуллугърикай ибарат тир и теклиф “Кеферпатан Кавказдин шегьеррин арада пассажирар санай масаниз тухудай компания” АО-ди ва туриствилин “Даг-Тур” ООО-ди санал кьилиз акъуднава.
Алукьзавай ял ядай йикъарилай башламишна, Махачкъаладин агьалийривай ва мугьманривай гьар гьяд юкъуз электричкайра аваз къадим Дербентдиз сейр ийиз жеда. Турдин программадик “Нарын-Къеле” имаратдиз фин, магьалра (куьгьне куьчейра) гид галаз экскурсия авун ва I Петрдин КIвализ мугьман хьун ква. Эхирдай туристар “Дербент” этно-кIвале милли тIуьнрихъ галаз танишарда.
Хабар гузвайвал, туриствилин сейрдин къимет 1400 манатдиз барабар я. Адак шегьеррин арада къекъвезвай Махачкъала-Дербент-Махачкъала поездра аваз финин, экскурсиядин, “Нарын-Къеледа” къекъуьнин ва милли тIуьнрин къиметар акатзава.
Сейрдин программа skppk.ru сайтдин “туризм” чинай ахтармишиз жеда.
«Лезги газет»
