И йикъара «Дагъустан» РИА-дин майдандал РД-дин гзаф квартирайрикай ибарат кIвалера умуми эменнидик акатзавай чкаяр бинедилай (капитальный) ремонт авунин алишверишдинди тушир фондунин регьбердин везифаяр тамамарзавай Нажмудин Ханбалаеван пресс-конференция кьиле фена. Ада Фондуни 2024-йисуз кьиле тухвай кIвалахрин нетижаяр раижна ва цIи вилик эцигнавай месэлайрикай суьгьбетна.
РикIел хкин, Дагъустандин капитальный ремонтдин фонд РД-дин Гьукуматдин къарардалди 2013-йисан 28-февралдиз арадал гъанай. А чIавалай, кьилди къачуртIа, 2014-йисалай къенин йикъалди, Н.Ханбалаева хабар гайивал, гзаф квартирайрикай ибарат кIвалера, умуми эменнидик акатзавай чкаяр бинедилай ремонт авунин региондин программадин сергьятра аваз, республикадин 120 агъзурдалай гзаф агьалийри чпин яшайишдин шартIар хъсанарнава.
«Дагъустандин Гьукуматди тестикьарнавай программадик, санлай къачурла, 15,7 миллион кв.метр тешкилзавай 4278 кIвал акатзава. Алатнавай 12 йисан вахтунда 884 кIвалин 2,91 миллион кв. метрдин умуми майдандик акатзавай 2031 тадарак ремонт авунва, лифтерин кIвалахдиз талукь 504 тадарак цIийибуралди эвезнава. Санлай къачурла, абурун къимет 1 миллиардни 200 агъзур манатдиз барабар я», — лагьана идарадин регьберди.
Кьилди къачуртIа, малум хьайивал, 2024-йисуз 758 кIвалин къенепатан инженервилин тадаракар ва гзаф квартирайрикай ибарат 20 кIвалин подвалрин чкаяр ремонтна. И кIвалахрин нетижада, гьисабзавайвал, 16409 агьалидин яшайишдин шартIар авайдалай хъсан хьанва. Алай йисуз авуна кIанзавай кIвалахрикай рахадайла, Н. Ханбалаева къейд авурвал, республикада 186 лифтинин ишлемишдай вахт алатнава, сифтени-сифте авуна кIанзавай кIвалахрин пландик абурукай 58 лифт цIийибуралди эвезун кутунва.
«Санлай къачурла, Фондунин делилралди, республикада 1582 лифт ремонт авун, эвезун ва я алай аямдин истемишунрив кьадайвал туькIуьр хъувун лазим я. 2025-йисан пландик муниципальный 12 тешкилатдин мулкарал алай гзаф квартирайрикай ибарат 118 кIвале капремонтдин кIвалахар кьиле тухун кутунва. И кар патал тахминан 880 миллион манат чара авунва», — лагьана ада.
Идалайни гъейри мярекатдал капремонт патал агьалийривай кIватIзавай гьакъидин месэладикайни рахана. ИкI, 2024-йисуз и делил 68,13 процентдиз (678,35 миллион манатдиз) барабар хьана. Гекъигун патал: адалай вилик квай 2023-йисуз агьалийрал илитIнавай тамам кьадардин 56,58 процент тешкилзавай гьакъи кIватIнай.
Гьа са вахтунда Фондуни буржарни активнидаказ кIватIзава: 2024-йисуз суддин къарарралди тахминан 290 миллион манат вахчуз алакьна. Гьа са вахтунда капремонтдин тарифар хкаж хьанва — алатай йисалай квадратный са кв. метрдилай къачузвай гьакъидин кьадар 2 манатдин багьа хьанва.
«Дагъустанда капремонт патал кIватIзавай гьакъидин кьадар (тариф) экономикадин жигьетдай кутугайди, бине авайди туш. Амма адан кьадар садлагьана хкажунни гуьзлемишзавач: ам яваш-яваш, гьар йисуз 2 манатдин хкажда», — лагьана Н.Ханбалаева. Ада республикадин агьалийриз кIватI хьанвай буржар вахтунда вахкуниз эвер гана.
Гьакъи гунин месэладикай рахадайла, Фондунин регьберди хабар гайивал, федеральный къанунда хьанвай дегишвилерал асаслу яз, капитальный ремонтдай гьакъи гудайла, кьезилвилер авай агьалийрин сиягь гегьеншарнава. Гила адак, чпин яш 18 йисалай алатнавай ва гзаф аялар авай хизанрай тир агьалийрилай гъейри, набутар, дяведин гьерекатрин ветеранар ва пенсионерар акатзава. Идалайни гъейри, кьезилвилерикай гила дяведин (кьенвай) инвалидрин, Ватандин ЧIехи дяведин иштиракчийрин хизанривай, гьакIни дяведин женгерин ветеранривай — абурун и дережа официальнидаказ тестикь хьайидалай кьулухъ — менфят къачуз жеда.
«Винидихъ чпикай лагьанвай къатарик акатзавай агьалийри, гьакъи гудайла, кьезилвилер ишлемишун ва финансрин жигьетдай акьалтзавай пар агъузарун патал чпин дережа тестикьарзавай документар ва арзаяр агьалияр яшайишдин рекьяй хуьдай органриз рекье тун лазим я», — къейдна Фондунин регьберди.
Жасмина Саидова
