Госкъуллугърин сайтдин куьмекдалди 14,5  агъзур дагъустанвиди чпел кредитар къачунин жигьетдай къадагъа эцигнава. И жуьреда­ къуллугъди агьалияр луту-путуйрин гьерекатрикай хуьзва. ИкI, арза кхьизвай касдин­ кредитриз талукь делилра и рекье гьерекатар къадагъа ийизвай махсус къейд эцигза­­ва. Ада банкариз ва микрофинанс­рин­ теш­килатриз кредитар ва бурж яз пулар (займ)­ гуниз талукь арзайриз разивал гудай мумкинвал­ гузвач. Банкариз ва микрофинансрин тешкилатриз кредитар ва займар гун тамамдаказ ва я са кьадар къадагъа ийиз жезва. Герек хьайи­ла ихьтин сергьятвилер Гос­къул­лугъдин сайтдин куьмекдал алудиз жезва.

РикIел хкин, агьалидиз вичел кредитар ва зай­мар къачунин жигьетдай къадагъа эцигдай ихтияр гузвай мумкинвал  Госкъуллугърин сайтда  алай йисан 1-мартдилай пайда хьана. Адалай инихъ алатнавай  куьруь вахтунда уьлкведа 5 миллиондилай гзаф агьалийри и месэладиз талукь яз арзаяр ганва, хабар гузва Россиядин рекъемрин министерстводи.

Госкъуллугърин порталдин мумкинвилерикай рахадайла, къейд ийин хьи, и йикъара ина 1-классдиз физвай аялар мектебриз кьабулун патал арзайрин черновикар ачухнава. Дагъус­танвийривай абур виликамаз ацIуриз жеда: арзаяр кьабулдай югъ алукьайла амукьзавайди анжах абур  «рекье тун» я. Мектебра арзаяр кьабулунин вахт мукьва жезва. Гьикьван фад куьне арза рекье туртIа, гьакьван еке мумкинвал ава хкянавай мектебдиз кьабулунин.

Хабар гузвайвал, Госкъуллугърин сайтда арзадин черновик гьазурайдалай кьулухъ ихьтин арзаяр кьабулдай вахт мукьва хьуниз талукь таймер кардик акатда. И кар патал, са югъ амаз, сайтди агьалидиз хабар гуда. Кьезилвилер авай агьалийрин арзаяр сайтди вичи (хабар тагана ва черновикдай къачуна) рекье твада.

Арзаяр кьабулдай вахтар:

30-июндалди – чеб пропискада авай чкадин, я тахьайтIа, маса гьина хьайитIани авай мектебдиз­ физвай ва чпихъ кьезилвилер авай аялар патал;

6-июлдилай 5-сентябрдалди – я прописка, я кьезилвилер авачир аялар патал. Ихьтин аялар хкянавай мектебриз анжах ана азад чкаяр хьунин шартIуналди кьабулда.

«Вахт ахъаймир — документар виликамаз гьазура ва жуван аялдиз мектебда чка таъминара», — тагькимарзава РД-дин образованидин ва илимдин министерстводи.

Жасмина Саидова