21-майдиз РД-дин Кьил Сергей­ Меликова республикадин кар алай месэлайриз талукьарнавай совещание кьиле тухвана. Кьилди къачуртIа, мярекатдин иштиракчийри гьукумдин органри агьалийрилай къвезвай арзайриз фикир гузвай гьалар ва Буйнакск шегьерда алатай йисуз хар къунин нетижада зиянар хьайи шегьерэгьлийриз куьмек гунин месэлаяр веревирдна.

Малум хьайивал, алатай гьафтеда ЦУР-ди дагъустанвийрин патай 1,2 агъзур арза кьабулна. РД-дин Кьилин ва Гьукуматдин Ад­ми­нистрациядин Руководителдин­ сад лагьай заместитель Махач­ Омарован гафаралди, килигун па­тал абурукай 159 арза — респуб­ликадин гьукумдин органриз, 434 — му­ниципалитетриз ва 153 яшайиш­дин къуллугъар агакьарзавай идарайриз рекье туна.

Сергей Меликова, и месэладин гьакъиндай баянар гудайла, агьалийрилай къвезвай арзайриз фикир гузвай гьаларилай вичин на­разивал къалурна. «Мукьвара за са шумуд дагъустанви кьабулна, абурун дердийрихъ яб акална. Абурун арзайриз хганвай жавабар акурла, якъин жезвайвал, жавабар вири сад-садаз ухшар я. Чиновник­ри, гьа жергедай муниципалитетра авайбуруни, арзайра къарагъарзавай месэлайриз артух фикир гузвач, гьялиз жезвай крарни яргъал вегьезва. Инсанриз кьуру хиве кьунар герек туш! Гьар са арзадин иесидихъ галаз кьилди рахун, дуьм-дуьз жавабар гун лазим я», — лагьана Сергей Меликова ва респуб­ликадин премьер-министрдал и кIва­лах кьетIен гуьзчивилик кутун тапшурмишна.

Дагъустандин Кьилин Адми­нис­трациядин арзаяр кьабулзавай отделдиз шаз хар къунин нетижада эменнидиз зиянар хьанвай Буйнакск шегьердин са шумуд агьалидилай арзаяр атанва. Арзачийрин гафаралди, государстводин патай­ хиве кьур куьмек абурал къени агакьнавач. «Чна бюджетдикни герек тир дегишвилер кух­тунва. Зиянар хьанвай ксарал гилани пулдин куьмек вучиз агакьнавач», — хабар кьуна Сергей Меликова Буйнакскдин мэрдивай.

Исламудин Нургудаеван гафаралди, къенин юкъуз зиянар хьайи 2279 кIвалив пулдин куьмек агакьнава. Жуьреба-жуьре себебар аваз, и куьмек агакь тавунвайбурун махсус сиягь туькIуьрнава. Шегьердин кьилин гафаралди, бязибур вахтунда герек тир документар администрациядив агакьар тавурвиляй, куьмек гузвайбурун сиягьдик акатнач. Чеб шегьерда авачирвиляй (яни патарал алайвиляй) сиягьра гьат тавунвайбурни ава.

РД-дин Гьукуматдин Председатель А. Абдулмуслимованни Урусатдин МЧС-дин РД-да авай Кьилин Уп­равленидин начальник Н. Къа­­­зимегьамедован гафаралди,­ зи­я­нар­ хьайи вири хизанриз куьмек гун патал республикадин де­режада­ аваз вири серенжемар кьабулнава.

Гегьеншдиз РД-дин Кьилин сайтдай кIелиз жеда.

Агьмед  Магьмудов