Зегьметди инсандал аферин ва баркалла гъида, лугьузва бубайрин мисалда. Шадвалдай кар ам я хьи, чилин къадир авай, зегьметдал рикI алай инсанриз хуьре-кIвале гьуьрметни ийизва. Абурув гьа зегьметдиз килигай наградаярни агакьзава. ИкI, и йикъара Сулейман-Стальский райондай тир са шумуд кас “Минмелиоводхоз РД” ФГБУ-дин директор Залкип Къурбанован къул алай гьуьрметдин грамотайриз лайихлу хьана. Абурун арада ФГБУ-дин Самур-Гуьргенчайдин филиалдин экскаваторщик Алаудин Гьажиагьмедовни ава. Грамотани адав шад гьалара “Сулейман-Стальский район” муниципальный райондин кьил Нариман Абдулмуталибова вахкана (шикилда).
А. Гьажиагьмедов республикадин дережадин грамотадиз лайихлу хьуни чун мягьтеларнач, гьикI лагьайтIа зегьметдал, техникадал рикI алай ам чаз фадлай ва хъсандиз таниш я.
Белиждин 8-нумрадин СГПТУ-да кIелуналди, Алаудина механизаторвилин пеше 1989-йисуз къачуна. Кьве йисуз армиядин жергейра къуллугъна хтайдалай гуьгъуьниз, къенин йикъалди, ада вичин рикI алай пешедай кIвалахзава. Сифтедай А.Гьажиагьмедова 4 йисуз Кьасумхуьруьн асфальтдин заводда зегьмет чIугуна. Ингье 20 йис я ада ФГБУ-дин Самур-Гуьргенчайдин филиалда экскаватордал кIвалахиз. Вичин хиве авай везифаярни тежрибалу механизаторди намуслудаказ кьилиз акъудзава. Кьилди къачуртIа, филиалди майишатрин арайринбур тир 8 къаналдиз къуллугъзава, санлай абурун яргъивал 198 километрдиз барабар я. И къаналар михьи авуник, абур къайдада аваз хуьник Алаудина вичин лайихлу пай кутазва.
— Алаудинан гьакъиндай завай анжах разивилин келимаяр лугьуз жеда, — суьгьбетзава ФГБУ-дин филиалдин руководитель Закир Ибрагьимова. — Гьи кIвалах тапшурмишайтIани, ам Алаудина вахтунда ва еридивди кьилиз акъудзава. Техникадин гъавурда авай пешекар тир ада вичив гвай экскаваторни гьамиша кIвалахдай къайдада аваз хуьзва. Гаф авач, халис зегьметкеш я Алаудин.
А. Гьажиагьмедован яргъал йисарин дурумлу ва гьакъисагъ зегьмет гзаф кьадар грамотаяр, пулдин премияр, къиметлу пишкешар гуналди къейднава.
Хазран Кьасумов
