Мергьяматлувилин къанунралди
Гьукуматдин идарайри, меценатри ва кьилдин ксари мергьяматлувилин серенжемар, адет яз, суварин йикъара тешкилда. Етим аялрал, ялгъуз яшлубурал, азарлуйрал, игьтияж авай хизанрал кьил чIугвада, абуруз савкьатар гуда. Амма чи дуьшуьш кьетIенди я, вучиз лагьайтIа ам “Ахцегьрин ичерин югъ” суварин сергьятра аваз, вилив хуьн тавур тегьерда арадал атана…
Лагьана кIанда, тIебиатдин къулайсуз шартIар себеб яз, шаз Ахцегьа ичерин бегьер хъсанди хьанач, недай ичерни авачирвиляй жемят са кило 60-70 манатдай базардай къачуниз мажбур тир. ЦIи, Аллагьдиз шукур хьуй, гьич мукьвал йисара тахьай хьтин бегьер ава, гьавиляй суварни кьиле тухвана, савкьатарни пайдай мумкинвал хьана.
“Жуван мал-девлетдилай садакьа гун хъсан кар я кьван, ша чна и суварин серенжемрик кваз жемятдивай гьардавай сад-кьве ящик хъсан ичер кIватIна, республикадин интернатризни аялрин ва яшлубурун кIвалериз ракъурин. Им чи патай мергьяматлувилин суваб кар, гьакI Ахцегьрин ичер машгьурунни жеда», — ихьтин теклиф гана суварин тешкиллувилин комитетдин совещанидал райондин общественный палатадин председатель Али Исмаилова.
Хъсан теклиф Ахцегь райондин кьил Осман Абдулкеримова, гьакI тешкиллувилин комитетдин совещанидал вири членри разивилелди кьабулна ва администрациядин нубатдин совещанидал райондин актив ва чкадин СМИ-дин такьатрин куьмекдалди вири районэгьлияр хабардарна. Саки гьа йикъалай башламишна инсанри чпин хушуналди гьарда сад-кьве ящик ичер гъиз, райадминистрациядин гараж ацIурна. И карда иллаки райондин волонтёрри, жегьилрин парламентдин членри чпин активвал къалурна, сагърай!
Ингье, “Ахцегьрин ичерин югъ” сувар алатайдалай кьулухъ ичер авай пар чIугвадай “Газель”, Али Исмаилован гуьзчивилик кваз (адахъ райондин СМИ-дин векиларни галай), виликамаз меслят хьайивал, Къарабудахкент райондиз рекье гьатна. Ана Ахцегьрин векилар райондин Общественный палатадин ва агъсакъалрин Советдин председатель Абдулгьамид Мамагишиевани маса юлдашри шаддиз къаршиламишна. Абурун теклифдалди, ихьтин савкьат Къарабудахкентда кардик квай республикадин бедендин мумкинвилер сер-гьятламиш хьанвай аялрин 18-нумрадин махсус школа-интернатдиз, набут аялар ва жегьилар сагъар хъийидай Центрадиз ва аялрин бахчайриз пайна.
Мергьяматлувилин серенжемдин гьакъиндай чухсагъул малумарунин гъвечIи мярекат республикадин 18-нумрадин махсус школа-интернатда кьиле фена. Ана Къарабудахкент райондин кьилин заместитель, райондин бубайрин Советдин председатель Жамалутдин Жамалутдинов кьиле аваз районда яшайишдин сиясатдин хилен начальник, дишегьлийрин Советдин председатель Гуьльжагьан Темировади, медениятдин хилен начальник Наида Мурзаевади, набут аялар сагъар хъийидай Центрадин директор Ака Исрапилова, школа-интернатдин регьбер Гуьляйбат Абулайшевади ва адан коллективди иштиракна.
Анал Ахцегь райондин Общественный палатадин председатель Али Исмаилова райондин кьил Осман Абдулкеримован, райсобранидин председатель Абдулкерим Палчаеван, гьакI вири районэгьлийрин патай чими саламар агакьаруналди, мергьяматлувилин серенжемдин кьилин макьсад Дагъустандин стха халкьарин алакъаяр мягькемарун тирди къейдна. Ада гьакIни и йикъара Ахцегьрин тIямлу ичер Дербент ва Махачкъала шегьеррин набут аялрин ва яшлубурун кIвалеривни агакьардайди раижна. “Чна кьил кутунвай мергьяматлувилин серенжемдикай чешне хьана, чи тежриба республикадин маса районрини кьабулдайдак умуд кутазва”, — алава хъувуна А.Исмаилова.
Ичерин савкьат хушвилелди кьабулуналди, Къарабудахкент райондин патай разивилин гафар Жамалутдин Жамалутдиновани Абдулгьамид Мамагишиева лагьана.
Гуьгъуьнлай Гуьляйбат Абулайшевади мугьманар кIелун, ял ягъун, халкьдин гъилин-тупIун сеняткарвилерални искусстводал машгъуларун патал ина набут аялриз яратмишнавай къулайвилерихъ, гьакIни бедендин мумкинвилер сергьятламиш хьанвай аялрихъни абурун муаллимрихъ галаз танишарна. Малум хьайивал, ина тербия къачузвай, сагъарзавай 122 аял ава. Ина тешкилнавай яшайишдин шартIарал (тIуьнрал, къаткидай чкайрал, гузвай чирвилерал ва пешекарвилин вердишвилерал) аялар чебни ва абурун диде-бубаярни гзаф рази я. Пара диде-бубайри гьар гьафтеда киш-гьяддин йикъара чпин аялар кIвалериз хутахиз-хкизва.
Къуй чи балайрин кьилел михьи ва экуь цав хьурай! Дагъустандин, санлай вири Россиядин гележегни — бахтлуди!
Дашдемир Шерифалиев
