СтIал Сулейманан райондин КIварчагърин хуьре Гьабиб Аллагьвердиеван тIварунихъ галай бокс вилик тухудай центрада тренер-муаллим яз зегьмет чIугвазвай Альберт Межидован гъилик вердишвилер къачузвай жаванри республикада ва адалай къецени кьиле физвай акъажунра хъсан нетижаяр къазанмишуникай чна идалай виликни хабарар ганай. ИкI, 23 ва 24-октябрдиз Дагъустандин Огни шегьерда боксдай кьиле фейи Кьиблепатан Дагъустандин ачух турнирда абуру нубатдин сеферда чпин устадвал къалурна. Чи республикадин жуьреба-жуьре районрай ва шегьеррай тир 80-дав агакьна жаванри иштиракай и акъажунриз СтIал Сулейманан райондин спортдин, туризмдин ва жегьилрин крарин рекьяй комитетди кIварчагъви жаванрикай ибарат тир хкянавай команда рекье тунвай. Абуру къизилдин 7 медаль къазанмишуналди, райондин хкянавай команда 1-чкадиз лайихлу хьана…
Ингье абур: Шамсудинов Агьмед (54 кг), Сейфулаев Имам (46 кг), Ферзулаев Айдабег (52 кг), Мегьамедов Икрам (34 кг), Гьасанбегов Мегьамед (57 кг), Тагьирбегов Эрзиман (50 кг) ва Несрединов Сулейман (34 кг).
Альберт Межидован гафарай малум хьайивал, жаванар тренировкайрив рикI гваз эгечIзавай, чпик умуд кутаз жедайбур я. Гележег авай боксеррин жергедай яз ада Артём Агъамегьамедовахъни (2-шикилда — тренер А.Межидовахъ галаз) тарифдай нетижаяр авайди къейдна. ИкI, алай йисуз ада са шумуд турнирда иштиракна, кIвенкIвечи чкаярни кьуна. Кьилди къачуртIа, 4 ва 5-октябрдиз Махачкъалада дуьньядин ва Европадин чемпион Тимур Гьайдалован призар патал 2007-2008-йисара дидедиз хьайи жаванрин арада кьиле фейи республикадин турнирда ам 1-чкадиз лайихлу хьана. РД-дин Кьиблепатан зонадин кIвенкIвечивал патал Избербашда ва ЦIийи Къаякентда кьиле фейи республикадин дережадин кьве турнирдани ада 1-чкаяр кьуна. Мадни ам Дагъустандин кIвенкIвечивал патал — Къизилюрт шегьерда ва Россиядин профсоюзрин кIвенкIвечивал патални Краснодардин крайда кьиле фейи акъажунрин финалдиз акъатна.
Къуй чи кьегьалрихъ гележегда мадни еке агалкьунар, спортдин кьакьан кукIушриз хкаж жедай къуватар артух хьурай!
Альберт Межидова СтIал Сулейманан райондин спортдин, туризмдин ва жегьилрин крарин рекьяй комитетдин директор Надир Эфендиеваз ва Белиждин спортшколадин директор Жамбулат Зейналоваз газетдин чинлай сагърай лугьун тIалабна.
Рагнеда Рамалданова
