Угъривал авунай шак финай
РД-дин МВД-дин пресс-къуллугъди хабар ганвайвал, Каспийскдин полициядин къуллугъчийри угъривал авунай шак фенвай чкадин 40 йисан яшда авай агьали кьунва. Тайинарнавайвал, ички хъвана, 48 йисан яшда авай Избербашдин агьалидихъ галаз къалмакъал авуналди, адавай 28 агъзур манатдин къимет авай мобильный телефон ва 45 агъзур манат пул къакъудна.
Шак фенвайда полициядин отделда вичи авур кар хиве кьуна. Ихтилат авурвал, пул ада вичин игьтияжар патал серфна, телефон лагьайтIа, зиян хьанвайдав вахкуз кIанзавай, амма хьанач. Телефон вахкун патал адаз полициядин къуллугъчийри “куьмекна”.
Арадал атанвай агьвалатдай суд-силис авун патал материал кIватIнава.
Къанунсуз алвер
Дербент райондин Сабнова хуьре уголовный розыскдин къуллугъчиди къанунсуздаказ наркотикралди алвер авунай, абур ишлемишунай шак финай 32 йисан яшда авай чкадин агьали кьуна.
Къейдзавайвал, агьалидин жибиндай героин квай (44 грамм) гъвечIи багълама жагъана.
Силис кьадай вахтунда жегьилди хабар гайивал, ада вичиз малум тушир, Москвада наркотикар маса гузвай интернет-туьквендин векилдихъ галаз мессенджердин куьмекдалди тахсиркарвилин гафар-чIалар сад авуна. Шак физвайда электронный киседиз 10 агъзур манат пул ракъурна ва вич самолетда аваз Москвадин областдиз метягь вахчуз фена. Чкадал фейила, ада мад героин вахчуна ва хкана.
Шак фенвайдаз талукь яз 228-статьядай (наркотик квай затIар къанунсуздаказ къачунай, хуьнай ва маса гунай) уголовный дело къарагъарнава.
Туьквен атIана
Леваша райондин агьалидал туьквендай метягь чуьнуьхунай шак физва. Райондин полициядин къуллугъчийри тайинарнавайвал, 12-сентябрдиз Ташкапур хуьре 28 йисан яшда авай чкадин агьалиди туьквендин ракIарал алай тIапIар кукIварна ва, къенез гьахьна, анай 29 400 манатдин къимет авай метягь чуьнуьхна.
Шак фенвайди полициядин къуллугъчийри отделдиз тухвана. Ада ихтилатнавайвал, туьквендин тIапIар арматурадин куьмекдалди кукIварна. Туьквендин дезгейрилай ада суьрсетар чуьнуьхна. Чуьнуьхай затIар дуьздал акъуднава ва туьквендин сагьибдив вахканва.
Къейднавай тахсиркарвилиз талукь суд-силис авун патал материал кIватIнава.
«Лезги газет»
