СтIал Сулейманан райондин администрациядин пресс-къуллугъди хабар гузвайвал, 19-сентябрдиз дуьньядин ва Европадин чемпион Икрам Алискеров хайи чилел шад гьалара къаршиламишна. Райондиз гьахьзавай къекъуьндал машгьур спортсмен фуни кьел гваз къаршиламишиз атанвайбурун арада райондин администрациядин спортдин, туризмдин ва жегьилрин крарин рекьяй комитетдин директор Чингиз Абдулмежидов, Агъа СтIалрин хуьруьн администрациядин кьил Надир Эфендиев, дзюдодай ва самбодай спортшколадин директор Тельман Къурбанов, спортсменар, хуьруьнвияр, культурадин идарайрин ва общественный тешкилатрин векилар, яратмишдай коллективар ва мектебра кIелзавай аялар (милли парталар алаз) авай…
Муниципалитетдин администрацияда давам хьайи гуьруьшдал спортдин уьмуьрда лишанлу вакъиа Икрамаз райондин кьил Саид Темирханова, адан заместителри — Лацис Оружева ва Заур Къагьриманова тебрикна. КIватI хьанвайбуру спортсмендин агалкьунар къейд авунихъ галаз сад хьиз, адахъ сагъвал ва хушбахтвал хьун, адалай итижлу бягьсер кьиле тухуз ва гъалибвилер къазанмишиз алакьун алхишна. Вичин гьунарралди ада неинки райондин, гьакI вири уьлкведин тIвар машгьурзавайди, районэгьлийри адан тIварцIел гьахълудаказ дамахзавайди къейдна.
Райондин кьили вичин ва администрациядин патай Икрамаз рикIел аламукьдай пишкешар, гьа гьисабдай яз хъенчIин къапар, лезгийрин куьгьне чешнедай гьазурнавай гапур, гьакIни райондин юбилейдиз акъуднавай “Край мыслителей и поэтов” ктаб гана.
РикIел хкин: И.Алискерова женгинин самбодай 2012-йисуз дуьньядин ва Европадин чемпионвилин тIвар, 2013 ва 2014-йисара Россиядин Кубок, 2014-йисуз дуьньядин Суперкубок, эхиримжи йисара кесерлу турнирра са шумудра гъалибвилер къазанмишна. Мукьвара США-дин Лас-Вегасда бразилияви М.Соузахъ галаз кьиле тухвай бягьс 1-раундда инанмишвилелди гъалибвал къазанмишуналди акьалтIарай Икрам Алискерова UFC-дихъ галаз икьрар кутIунна. Алай вахтунда ам, ММА-дай бягьсер кьиле тухунал гьалтайла, дуьньяда тIвар-ван авай и тешкилатдихъ галаз икьрар кутIуннавай чи миллетдин векилрикай сад лагьай спортсмен я.
_______________________________________________________
И йикъара райадминистрацияда, Дагъустандин халкьарин садвилин йикъан сергьятра аваз, спортдин кесерлу майданра неинки райондин, гьакI республикадин, уьлкведин тIвар машгьурзавай спортсменрив шабагьар вахкуниз талукьарнавай шад мярекатни кьиле фена…
Райондин кьиле авай ксарин, спортдин, туризмдин ва жегьилрин крарин рекьяй комитетдин директор Ч.Абдулмежидован, спортшколайрин директоррин ва тренеррин иштираквал аваз кьиле фейи мярекатдал Вирироссиядин ва республикадин дережадин акъажунра виниз тир агалкьунар къазанмишунай, гьакIни райондин спорт ва физический культура вилик тухуник лайихлу пай кутунай гиряяр хкажунай Вирироссиядин ва республикадин фестивалрин гъалибчи, Кьиблепатан территориальный округдин рекордсмен Эдик Агьмедовав, азаддаказ кьуршахар кьунай Дагъустандин чемпион, Россиядин чемпионатда буьруьнждин медаль къазанмишай Саид Амахановав, универсальный бягьсерай дуьньядин кьве сеферда чемпион, самбодай Вирироссиядин Спартакиададин буьруьнждин призер Аслан Къурбановав СтIал Сулейманан райондин гьуьрметдин грамотаяр вахкана.
С.Темирханова спортсменриз гъалибвилер тебрикна, гележегда мадни виниз тир агалкьунар хьун алхишунихъ галаз сад хьиз, ватанэгьлийри спортдин кесерлу майданра къазанмишзавай агалкьунралди дамахзавайди къейдна, районда спорт ва физический культура вилик тухуниз талукь кIвалахдикайни куьрелди лагьана.
Мярекатрин эхирдай спортсменри чпин гележегдин планрикай суьгьбетна, массовый спорт ва физический культура вилик тухуникай чпин фикирар раижна, агалкьунриз къимет гунай райондин кьиле авай ксариз ва хайи райондин агьалийриз сагърай лагьана.
Рагнеда Рамалданова
