Гзаф наркотикар дуьздал акъудна
МВД-дин къуллугъчийри Махачкъалада гзаф кьадар наркотикралди алверунай шак физвай агьали кьуна. Идакай РД-дин МВД-дин пресс-къуллугъди хабар гузва.
Тади серенжемар кьабулай вахтунда полициядин къуллугъчийрив 40 йисан яшда авай агьалиди наркотикар квай такьатар маса гузва лагьай хабар агакьна. Тахсиркарвиляй шак физвай агьали кьуна ва адав гваз хьайи 1040 грамм эфедрон вахчуна.
Къайдаяр хуьдай органрин къуллугъчийри шак физвайди яшамиш жезвай кIвални ахтармишна. Нетижада мад 1 килограмм эфедрон дуьздал акъатна. Кьунвайдан гафаралди, наркотикар ада машгьур мессенджердин куьмекдалди маса къачуна.
РФ-дин УК-дин 30-статьядин 3-паюнай, 228.1-статьядин 5-паюнай уголовный дело къарагъарнава.
«Лезги газет»
