176-нумрадин Федеральный закондал асаслу яз, алай йисан 1-январдилай юзан тийидай эменнидин патахъай ихтиярар регистрация авунин ва кадастрдин учетдин госпошлинадин гьахъ-гьисабдиз талукь цIийи дегишвилер къуватда гьатнава. Идакай чаз МФЦ-дин кьилин идарадин пешекарри хабар гана. Кьилди къачуртIа, ихьтин дегишвилер:

 юзан тийидай объект хсусият­ тирди тестикьарунин (ихтиярар ре­ги­с­т­­рация авунин) госпошлина объект­дин ка­дастрдин къиметдилай аслу жеда. И кар гьам ксариз, гьам идарайриз талукь я;

 объект кадастрдин учетда эцигун патал цIийи госпошлина (икьван чIа­­валди авачир) кардик кутунва: юзан тийи­дай объект арадал гъидайла, — 2000 манат, объектдиз талукь малуматар де­гишардайла, — 1000 манат, тешкилатар патал объект арадал гъидайла, — 22 агъзур манат, объектдиз талукь малуматар дегишардайла, — 2000 манат;

 юзан тийидай объектрихъ галаз алакъалу савдадин икьрар фад-фад (кIвалахзавай са йикъалай артух тушиз) регистрация ийидай мумкинвал пайда хьанва. Амма и къуллугъдай гузвай гос­пошлина адетдиндалай кьве сеферда артух жеда;

 кадастрдин къимет тайинар тавунвай ва я къимет 20 миллион манатдилай артух тушир объектдиз талукь госпошлина гила 4 агъзур манатдикай ибарат жезва;

 эгер кадастрдин къимет 20 миллион манатдилай алатзаватIа, госпошлина кадастрдин къиметдин 0,02 процентдикай ибарат жеда, амма 500 агъзур манатдилай артух тушиз;

 эгер кадастрдин къимет тайи­нарнавачтIа ва я объектдин къимет 22 миллион манатдилай артух туштIа, госпошлинадин кьадар 44 агъзур манат жеда.

Ибурулайни гъейри, 1-январдилай бязи госпошлинайрин кьадар кьве сеферда артух хьанва:

 куьмекдин хсуси майишат, майвачивал, багъманчивал кардик кутун патал чилин участок ва я ИЖС регистрация авунай;

 ихтияррин гьакъиндай ЕГРН-дин кхьинрик дегишвилер кухтунай;

 юридический идара цIийи кьилелай тешкил хъувунихъ (ва я идараяр сад авунихъ) галаз алакъалу яз юзан тийидай объектдин ихтиярар масадан кIвачихъ хъиягъун регистрация авунай.

1-январдилай кьезилвилерин (льгота) пошлинайрин кьадарни артух хьанва. Мисал яз, икьван чIавалди хсусиятчийри ЛПХ-дин, ИЖС-дин чилин участокар регистрация авунай 350 манат госпошлина гузвай, гила адан кьадар 700 манат хьанва.

Къейд ийин, госпошлинайрин гьа­къин­дай галай-галайвал малуматар чи­рун­ патал РФ-дин Росреестрдин сайтда «Каль­кулятор расчета госпошлины» сервисдикай менфят къачуз жеда.

«Лезги газет»