Тапан чек ишлемишуналди
Ботлих райондин полицейскийри тапан чекер ишлемишунай шак фенвайди кьуна. Идакай РД-дин МВД-дин пресс-къуллугъди хабар гузва. Райондин полициядин отделдиз 61 йисан яшда авай дишегьлиди хабар гайивал, малум тушир касди адан туьквендай костюм хкяна, амма пул гудалди вилик ада 2 агъзур манат нагъд пул вичив вугун тIалабна ва къачур метягьдин гьакъини галаз санал счетдиз рахкурун хиве кьуна.
Дишегьлидиз тапан чек къалурайдалай кьулухъ жегьил гада туьквендай экъечIна, амма туьквенчидив пул агакьнач.
Полициядин къуллугъчийри тайинарайвал, чIуру къаст авайдан «къурбандриз» мад кьве туьквенчи элкъвена.
Тахсиркарвиляй шак фенвай ЦIумада райондин 22 йисан яшда авай агьали кьунва. Ада вичи авур кар инкарнач. Ихтилат авурвал, тапан чекер къалуриз, ада чарабурун пулар ва метягьар вичиз къачуз хьана.
Такьатрин жигьетдай хьанвай зарардин умуми кьадар тайинарзава.
«Лезги газет»
