Кьилиз яд чимун я
Дагъустандин МВД-дин къуллугъчийри РФ-дин РД-да авай УФСБ-дин къуллугъчийрихъ галаз санал Ханты-Мансийскдин 15 йисан яшда авай агьали кьуна. Адал Махачкъаладин ва Избербашдин са шумуд объектдик минаяр кутунва лагьай тапан малуматар чукIурунай шак физва, хабар гузва РД-дин МВД-дин пресс-къуллугъди.
Къейдзавайвал, алай йисан сентябрдизни октябрдиз жегьил гадади Махачкъаладинни Избербашдин полициядин отделриз са шумудра зенгер авуна. Ада отделдин дараматра, гьакIни 2 мектебда ва са паркуна хъиткьинардай затIар эцигнава лагьана хабар гана. И дуьшуьшра тади гьалда серенжемар кьабулун патал чкадал къайдаяр хуьдай органрин векилар атана. Дараматар ва абурун къваларив гвай мулкар ахтармишунин нетижада шаклу гьич са затIни дуьздал акъатнач.
Кьунвайда ихтилат авурвал, сес дегишардай программадикай менфят къачуналди, ада зенгер авуна ва чарадан хсуси делилар раижуналди, вич вуж ятIа малумарнач. Ихьтин нагьакьан кар авуналди, жегьилди вичин кьилиз яд чимна.
РФ-дин УК-дин 207-статьядин 2-паюнай уголовный дело къарагъарнава.
«Лезги газет»
