Лутувиляй шак физва
РД-дин МВД-дин пресс-къуллугъди хабар гузвайвал, полициядин къуллугъчийрив Махачкъалада кардик квай электроникадин туьквендин заминвилин (гарантиядин) отделдин 26 йисан яшда авай регьберди 2022-йисан ноябрдилай инихъ, заминвиляй метягьар элкъуьрна вахкунин гьакъиндай тапан чарар-цIарар туькIуьрна, бухгалтериядиз вахкуналди, идарадин иесидиз 547400 манатдин зарар ганва лагьай хабар агакьна.
Арадал атанвай гьаларай кьил акъудун патал шак фенвайди полициядин отделдив агакьарнава. Малум хьайивал, шак фенвайда къастуналди интернетдай ишлемишнавай (эвелдай чеб гьа и туьквендай маса къачунвай, заминвал къуватда амай) видеокартаяр маса къачуна.
Гьа икI, маса къачур видеокартаяр ада, гуя туькIуьр хъжезвач лугьуз, эвелан иесийрин тIварцIихъай ремонтдиз вугана ва къайдадик кухтунин вахтни кьасухдай яргъал вегьез хьана. Ремонт авунин вахт куьтягь хьайила, ада цIийи метягьдин къиметдин кьадарда аваз пул вахчуна.
И делилдай суд-силис авун патал материал кIватIнава.
«Лезги газет»
