Ихтияр къачунва

Дагъустанда ракъинин чIехи элек­тро­­станция эцигун патал ихтияр­ къачунва. Идакай «Дагъустандин эко­но­мика» телеграм-каналди хабар гузва. Чешмеди кхьизвайвал, Дербент район­да эцигзавай 6,5 миллион манатдин къиметда авай и объект 2025-йисуз акьалтIарун вилив хуьзва. Инвестпроект уьмуьрдиз кечирмишзавайди «Солар системс» тешкилат я. Ам кьилиз акъудуникди 100 МВт-дилай артух гужлувал авай станция кIвалахдик акатда.

ГьакIни вилив хуьзвайвал, цIийи электростанцияди 25 агъзур кIвал энер­гиядалди таъминарда ва 30 касдиз датIа­на кIвалахдай чкаяр арадал гъида. Чешмеди къейдзавайвал, и объект хкажун патал 305 гектар чил чара авунва, вични­ савдаяр кьиле тухунин серенжемар галачиз.

Гьа са вахтунда РД-дин Гьукуматдин телеграм-каналди хабар гузвай­вал,­ вичикай ихтилат физвай объект эцигунин кIвалахар кьилиз акъуддайла, кIвалахдин чкаяр 200 касдиз жеда. Дербент районда хкаждай цIийи СЭС-ди (ракъинин электростанцияди) регион йисан къене 40 млн кВт/ч-дин кьадарда аваз михьи энергиядалди таъминарда.

18 куьче туькIуьр хъийида

Алай йисан эхирдалди Махачкъалада, «Хатасуз ерилу рекьер» махсус прог­раммадин сергьятра аваз, шегьердин жуьреба-жуьре районра ва поселокра 18 куьче аваданламишун пландик кутунва. Идакай «Дагъустан» РИА-ди хабар гузва.

РД-дин транспортдин ва рекьерин майишатдин министерстводал асаслу яз малумарзавайвал, проект уьмуьрдиз кечирмишун патал ийизвай кIвалахар графикда къалурнавай вахтунилай фадамаз кьиле физва.

Гьа са вахтунда ведомстводин те­леграм-каналдин къейдерай малум жез­вайвал, винидихъ чпикай ихтилат физвай серенжемар ихьтин макьсадар патал кьилиз акъудзава:

 рекьин гьерекатдин хатасузвал таъ­минарун;

 гьам яхдиз физвай ксар, гьамни шоферар патал къулай шартIар арадал гъун;

 рекье акъатзавай вахт тIими­ла­рун;

 транспортдикай менфят къачудай мумкинвал хъсанарун.

Троллейбусар ­хуьдай фикир ава

Махачкъаладин гьукумдин кьилевайбурухъ шегьерда троллейбусар хуьдай фикир ава. Идакай «Дагъустан» РИА-ди хабар гузва.

Кьилди къачуртIа, агентстводи кхьиз­­вайвал, Махачкъаладин мэрди  Да­­гъустандин меркезда, пулдин такьат­рин жигьетдай гьалар четин хьунизни­ килиг тавуна, троллейбусар хуьнин, абур тунин лазимвал авайда­кай­­ къейдна. Алай вахтунда Махачкъаладин тран­спортдин управление буржлу хьанвай такьатрин кьадар 174 миллион манатдилай виниз акъатнава.

«Дагъустандин экономика» телег­рам-каналди троллейбусрин кIвалах пулдин такьатралди таъминвал авачирвиляй михьиз акъваз хьанвайдакай кхьенай. Къейдзавайвал, Махачкъа­ла­дин троллейбусрин управлениди пул­дин такьатар, рекьин къимет екеди хьунай хгузвай эвездин пулар хьиз, шегьердин бюджетдай къачузвайди я.

Бул бегьеррихъ ­галаз санал…

Дагъустанда емишрин бегьерар­ артух хьунихъ галаз сад хьиз, абур хуьдай цIийи чкаярни эцигзава. Идакай РД-дин хуьруьн майишатдин­ ва недай суьрсетдин министерстводи­ хабар гузва. Къейдзавайвал, 2024-йисуз респуб­ликада, виликамаз­ кьунвай делилралди, 225 агъзур тонндилай тIимил тушиз емишар кIватI хъийида. Им, 2023-йисав гекъигайла, виниз тир рекъем я. Кьилди къачуртIа, шаз 220 агъзур тонндилай артух емишар кIватI хъувунай.

Чешмеди кхьизвайвал, Дагъус­танда­ багълар, майданрин кьадар, санлай­ къа­чурла, 30 агъзур гектардилай виниз мул­ка­ра экIя хьанва. Абурукай саки 23 агъзур гектар бегьер гудай гьалда авайбур я.

Чешмедин делилралди, эхирим­жи вад йисуз регионда 5,3 агъзур гектардилай виниз емишрин цIийи багълар кутунва.

Гьазурайди – Муса  Агьмедов