“Эгер квез аялар хъсанбур яз чIехи хьана кIанзаватIа, абуруз пул кьве сеферда тIимил, вахт кьве сеферда артух харж ая”, — лагьанай Британиядин писатель Эстер Селсдона. Эхь, диде-бубадихъ аялдихъ галаз санал жезвай, адахъ гелкъвезвай, ам уьмуьрдин рекьел акъудзавай вахт гьамиша гзаф хьун герек я. ТахьайтIа, аялдив къецепатай агакьзавай тербия гзаф жеда.
Чи хуьруьнви, Бут-Къазмайрин юкьван школадин муаллим Букарова Фатума Казумовнадин кIвалахдин къайдайрихъ галаз таниш хьайила, винидихъ тIвар кьунвай камаллу дишегьлидин, писателдин гафар зи рикIел хтана.
Фатума Казумовна лезги чIаланни литературадин муаллим я. Ада 1997-йисуз ДГПУ дин филологиядин факультет куьтягьна, 2000-йисалай ада вичин чирвилер Бут-Къазмайрин аялриз гузва, абуруз дидед чIалан тIям чирзава.
Вичин кеспидал рикI алай пешекар хьуни, аялриз авай кIанивили, абурун чирвилер артухарун патал чIугвазвай зегьметди, тарсар тухунин кьетIен, вичиз хас тир тежрибади, методикадин бегьерлу къайдайри тарифлу нетижаярни арадал гъизва. Ф.Букаровади 2018-йисуз “Дидед чIаланни литературадин лап хъсан муаллим” конкурсда иштиракна ва Мегьарамдхуьруьн районда — сад лагьай, Махачкъалада республикадин конкурсда пуд лагьай чка кьуна.
Фатума муаллим, дидед чIалариз школада сятер тIимиларнава лагьана, гъилер куьрсна акъвазнавач. Ада, вахт жагъуриз, аялрихъ галаз программадилай алава яз мярекатар тухузва. Абурун тематика жуьреба-жуьре я: чIалаз, литературадиз талукь ачух тарсар, лезги шаирризни писателриз талукьарнавай межлисар, абурухъ галаз гуьруьшар, лезги фольклордиз талукь сегьнеяр…
Фатума Казумовнадин гьар са тарс аялар патал ачухзавай чи халкьдин эдебиятдин, медениятдин, тарихдин са цIийи чин я. Адалай а чинар регьятдиз, вичиз хас тир тегьерда — устадвилелди аялрал агакьариз алакьзава.
И йикъара “ГъвечIи халкьдин чIехи шаир” лишандик кваз Бут-Къазмайрин школадин ирид ва муьжуьд лагьай классрин аялрин иштираквал аваз Ф.Букаровади тухвай ачух тарсунин шагьид зунни хьана. Мярекат Дагъустандин халкьдин шаир, ХХ асирдин Гомер СтIал Сулейманаз талукьарнавайди тир. Аялри СтIал Сулейманан уьмуьрдикай, яратмишунрикай, ам яшамиш хьайи девирдикай гегьеншдиз суьгьбетарна, адан шиирар устадвилелди хуралай кIелна. Ахпа тарс суал-жаваб жуьреда давамарна. Аялри гузвай тамам, дуьз, савадлу жавабри, абуру чеб тухунин низамди, дидед чIалал михьиз рахуни рикI шадарзавай.
Инанмишвилелди лугьуз жеда хьи, хайи литература кIанарунин, аялрин рахунрин фасагьатвал ачухарунин жигьетдай тарс маналуди хьана.
Мярекат неинки аялриз, гьакI атанвай мугьманризни таъсирдайди, рикIел аламукьдайди тир. Лугьуз жеда хьи, ачух тарс вичин метлебдив агакьна.
Фатума Казумовнадихъ, гьакI школадин вири коллективдихъ чпин четин, амма баркаллу кIвалахда агалкьунар хьурай!
Тамила Салманова
