«Саида, чан руш, чIехи хьайила, вакай духтур жеда. Ваз бицIекар гзаф кIанда, гьавиляй вуна аялрин духтурвилин пеше хкягъайтIа, хъсан я…» — гъвечIи чIавалай Саидадиз мукьвал-мукьвал ван къвезвай гафар гьа ибур тир. Чпин авай са рушакай духтур хьун адан дахдинни бахдин мураддиз элкъвенвай. ГьакI хьунни авуна. Диде-бубади адаз духтурдин пеше акьван кIанарна хьи, мектеб акьалтIарайдалай кьулухъ Саидади кIелунар Урусатдин Н.И.Пирогован тIварцIихъ галай милли ахтармишунрин медуниверситетда давамардай къарар кьабулна, вични гьа дахдизни бахдиз кIан хьайи пешекарвиляй – педиатриядай.
Ша чун гила Саидадихъ галаз мукьувай таниш жен. Цилингви Тельман Мегьамедагъаеван хизанда 1993-йисан 9-февралдиз дидедиз хьайи руш веледдал Саида тIвар эцигна. Сифтегьан классра ада Дербент райондин Белиж поселокдин мектебда кIелна. Гуьгъуьнлай кIелунар Москвадин областдин Долгопрудный шегьердин 14-нумрадин мектебда давамарна. 2010-йисуз винидихъ тIвар кьур вуздик экечIна. Къейд ийин хьи, Саидадин бубани диде карчивилел машгъул я. Мегьамедагъаеврин хизанда Саидадал къведалди вичин уьмуьр духтурдин пешедихъ галаз алакъалу авурди авачир. Гила лагьайтIа, чIехи вахалай чешне къачуна, Саидадин гъвечIи стхадини медуниверситетда чирвилер къачузва.
Вириданбур хьиз, Саидадин студентвилин йисарни рикIел аламукьдай жуьреба-жуьре вакъиайрив ацIайбур хьана. Эхиримжи курсуна кIелзавайла, ада Москва шегьердин здравоохраненидин къурулушдин «Школы профессионального роста» проектда иштиракна ва и карди адаз Москвадин здравоохраненидин департаментдин аялрин 133-нумрадин поликлиникада педиатр яз кIвалахдай мумкинвал гана.
Уьлкведа коронавирусдин тIегъуьн пайда хьайи 2019-йисуз Саида Мегьамедагъаевадин хивевай везифаяр мадни артух хьана. Ада вичин вири къуватар 18 йисал къведалди яшара авай аялар и фендигар тIегъуьндикай хуьнал желбна.
2021-йисалай ам «Ультразвуковая диагностика» (УЗД) пешекарвиляй Москвадин А.И.Евдокимован тIварцIихъ галай государстводин медико-стоматологиядин университетдин клиникадин ординатор я. Алай вахтунда лагьайтIа, цилингвидин руша Москва шегьердин В.М.Буянован тIварцIихъ галай клиникадин больницада ультразвуковой диагностикадин духтур яз зегьмет чIугвазва.
Гзафбуру, Дагъустандив гекъигайла, Москвада медицина вилик фенвайди яз гьисабзава. Духтуррин пешекарвилел, чирвилерал гьалтайлани, уьлкведин меркездин больницайра кIвалахзавайбур республикадин пешекаррилай са шумуд кIарцIин вине ава лугьузва. Гьакъикъатдани гьакI яни, тушни за Саидадивай жузуна.
— Дагъустандинни Москвадин здравоохраненидин хилера авай тафаватдин патахъай завай атIай жаваб гуз жедач, — къейдна суьгьбетчиди. – За Дагъустанда кIвалахнач, гьавиляй куьне хабар кьазвай месэладиз залай тайин тир къимет гуз алакьдач. Са кар якъин я: неинки са чи республикадив, гьакIни уьлкведин гьи региондив гекъигайтIани, Москвадин здравоохранение, шак алачиз, тариф авуниз лайихлу я.
Алай вахтунда Саида Мегьамедагъаевади, УЗД-дин духтур яз кIвалахзаватIани, педиатрдин пеше гадарнавач. Кьве рекьяйни – гьам чIехибуруз, гьамни гъвечIибуруз – медицинадин куьмек гузва.
Хайи ерийривай яргъа, Долгопрудный шегьерда чIехи хьанватIани, Саидадиз хъсандиз лезги чIал чизва. Неинки са шегьердин, гьатта хуьруьн чкадани гзафбур урус чIалал рахазвайди фикирда кьуртIа, фасагьатдиз дидед чIалал рахаз хьунни Саидадин агалкьун я. Им неинки са адан, гьакI хайи чIалаз, милли адетриз рикIивай гьуьрметзавай, чпин веледар абурал рикI алаз чIехи авунвай диде-бубадин агалкьун язни гьисабиз жеда.
Чи суьгьбетдин эхирдай Саидади газет кIелзавайбурун тIварцIихъни хуш келимаяр лагьана: «Сифте нубатда заз чи ватанэгьлийрихъ мягькем сагъламвал хьана кIанзава. Духтуррин патав азарлубур яз ваъ, азаррин вилик пад кьун патал меслятар къачуз къведайвал хьурай! Амма, начагъ хьана, духтурдин куьмекдихъ муьгьтежбур аваз хьайитIа, зун жуван ватанэгьлийриз алакьдай куьмекар гуз гьазур я», — лагьана ада.
Чазни газет кIелзавайбурун тIварцIихъай чи рушаз, жегьил пешекардиз сагърай лугьуз кIанзава. Къуй вал уьмуьрда гьалтдайбур къени, хъсан инсанар хьурай, вун ви рикIевай вири экуь мурадрив агакьрай! Амин!
Мегьамед Ибрагьимов
