СтIал Сулейманан райондай гъвечIи ватан яргъарани машгьур авур алимар, писателарни шаирар, генераларни хъсан пешекарар гзаф акъатна.
“…Тама зурба мегъуьн тар гьалтда. Ам зурбади хьун адалай вичелай ваъ, ам экъечIнавай чилелай — накьвадилай аслу я. Эгер а тар къван квай чкада экъечIнавайтIа, акьван зурбадини жедачир”, — лагьанай Х.Абовяна.
Райондай машгьур ксар акъатун адан бегьерлу, баркаван чилелай аслу я. Ваъ, къе зун я алимдикайни рахадач, я гьакимдикайни. Зи ихтилат хайи чилин “таза къелем” тир Замир Небиевакай я. Ада Агъа СтIал-Къазмайрин умуми образованидин школада 1-классда кIелзава, гьам школада, гьамни районда тухузвай гьар жуьредин мярекатра иштиракзава, анра вичин кьетIен алакьунар къалурзава.
Алай йисан 13-октябрдиз Кьасумхуьрел, Сулейман-Стальский РОВД-дин цIийи дараматрин комплекс ачухунин мярекатдин сергьятра аваз, махсус форма алаз, Дагъустан Республикадин Кьил Сергей Меликован вилик атана, “Донбассдиз” шиир устаддаказ кIелайдалай гуьгъуьниз Замиран тIвар райондилай къецени машгьур хьана. Россиядин МВД-дин СКФО-да авай ГУ-дин начальник, полициядин генерал-полковник Сергей Бачурина, вичин гьейранвал ва шадвал къалурун яз, Замиран кьилел вичин бармак алукIна, ам адаз савкьат яз гана.
— Зи чIехи буба Бугьадин Ватандин ЧIехи дяведин иштиракчи, ругуд шабагьдин сагьиб я, — лагьана ада мярекатдал ва алава хъувуна: “Закайни Ватан хуьдайди, офицер жеда!”.
ГъвечIи ватанперес Замир зазни лап хъсандиз чида. ГьикI лагьайтIа, ам чи кIвалахдин юлдаш, райондин информагентстводин руководителдин заместитель — Кьасумхуьруьн телевиденидин кьилин редактор Эльвира Небиевадин гада я.
З.Небиева вичин сифтегьан кьетIенвилер, алакьунар гьеле ЦIийи поселокдин аялрин “Аленушка” бахчада авайла къалурна. Лезги ва урус чIаларал шиирар хуралай кIелунай тухвай райондин ва республикадин конкурсра ада сад лагьай ва пишкешдин чкаяр кьуна. Идай Замираз са шумуд грамота ва пулдин пишкешар гана.
— 1-сентябрдилай Замира за регьбервал гузвай 1-классда кIелзава, — лугьузва Агъа СтIал-Къазмайрин умуми образованидин школадин сифтегьан классрин муаллим Ильяна Агъамирзоевади. — Сифте йикъарилай Замира вич низам, ахлакь, кьатIунар авай ученик яз къалурзава. Классда авай амай аялрихъ галаз ам гзаф гьуьрметлу я. Адаз гьам Дагъустандин, гьамни Урусатдин гзаф шаиррин эсерар хуралай чида.
З.Небиева мукьвара Седакъет Керимовадин “Чун лекьер я” шиир кIелунай райондин школьникрин арада тухвай серенжемдани иштиракна, алакьунар къалурна.
— Вичин военный форма, конкурсда гъалиб хьунай ганвай 7 грамота хьиз, полициядин генерал-полковник Сергей Бачурина савкьат яз ганвай бармакни Замира ядигар яз хуьзва, — лугьузва Эльвира Небиевади.
Винидихъ лагьайвал, З.Небиевахъ, чIехи хьайила, Ватан хуьдайди, офицер жедай къаст ава. Чазни, ватанперес хцихъ элкъвена, лугьуз кIанзава: вун рикIе авай мураддихъ агакьрай, Замир!
Хазран Кьасумов
