“Чи Гъалибвал” тешкиллувилин комитетдин пешекаррин советди тайинарнавай вахтунин 15 декьикьада вири суалриз дуьз жавабар гайи 239 иштиракчидикай дуьшуьшдин (рандомдин) къайдада федеральный 20 гъалибчи хкяна, хабар гана “Сад тир Россиядин” международный “Гъалибвилин диктант-2022” серенжемдин нетижаяр кьур пресс-конференциядал Госдумадин информациядин сиясатдин рекьяй комитетдин председатель Александр Хинштейна.

Шад жедай кlвалах ам я хьи, междуна­родный “Гъалибвилин диктант-2022” серенжемдин федеральный 20 гъалибчидин арада Дагъустандай тир иштиракчи — Бе­лиж­ поселокдин юкьван образованидин     3-нумрадин школадин муаллим, чи лезги тават  Тимурова  Надият  Ханкишиевнани  ава.

И зурба мярекат дуьньядин 45 уьлкведа кьиле фена. А.Хинштейна  пресс-конференциядал  малумарайвал, алай йисуз серенжемда 1,6 миллиондилай гзаф ксари иштиракна. Гъалибвал къазанмишнавайбурун арада виридалайни жегьилдан 15 йис, виридалайни чlехидан 84 йис я.

Чна школадин директор Магьмуд Магьмудовавай фамилия алачиз кхьенвай диктантдай квез Надият Ханкишиевна кlвен­кlве­чийрин арадиз гьикl акъатнатlа, гьинай чир хьана, лагьана хабар кьуна.

— Райондин образованидин управлениди директоррин дестедиз жавабрин бланкдин шикил ракъурна, и муаллим гьи школадай ятlа,  жаваб ракъурун тlалабна­вай. Вуч патал герекзава лагьана хабар кьурла, бес Москвадай зенг атанва а муаллимдин тlвар чириз кIанзава лагьана. За “Гъалибвилин диктантда” чи школадай иштиракай муаллимриз къалурайла, ам Надият Тимуровадин кIвалах тирди чир хьана.

Райондай и хабар гъиле-гъил аваз Москвадиз ракъурна.

Москвадай Надият Ханкишиевнадиз Александр Хинштейнан зенг атана. Ада гъа­либчидиз и агалкьун тебрикна ва ноябр­дин эхирдай “Сад тир Россия” партиядин патай шабагь вахкун ва Гъалибвилин парадда иштиракун патал атун теклифна.

Надият 1970-йисуз Дербент райондин Белиж поселокда дидедиз хьана. 1976-1987-йисара ада Белиждин 2-нумрадин юкьван школада, 1988-1993-йисара Да­гъус­тандин пединститутда кlелна. Кlва­лах­дивай къерех тахьана, 2009-йисуз Ивановодин госуниверситетдин тарихдин факультетдик экечlна, 2015-йисуз анаг хъсан къиметралди акьалтlарна.

Надият Ханкишиевна муаллимвилин кIвалахдин 21 йисан стаж авай сад лагьай дережадин муаллим я. Ада чирвилер ва тербия гунин рекье, вичин  кlвенкlвечи муаллимрин тежрибадал асаслу яз, цlийи къайдаяр твазва. Икl,  ада, алим Татьяна Николаевна Ивановнадин тежрибадал асаслу яз, “Использование театрализованных представлений на уроках истории в 6 классе” проект туькlуьрна ва, Михаил Тимофеевич Студеникинан фикирдал асаслу яз, “Адетдинбур тушир тарихдин тарсар” программа гьазурна.

“Кlвалахда адан яратмишунрин тема “Тарихдин тарсара адетдинбур тушир къай­да­яр ишлемишун” я. Адан тарсар итиж­лудаказ, гьевеслудаказ кьиле физва. На­дият­ Ханкишиевнади аялрин чирвилерин дережа, кьатlунрин активвал хкажунин мураддалди тарсара алай аямдин образованидин технологияр ишлемишзава. Адаз та­рих­дин тарс гудай методика хъсандиз иш­ле­мишиз чизва. Ам классрин руководителрин методобъединенидин регьбер я. Вичин­ кlвалахдин тежриба ада юлдашризни мерд­вилелди чирзава”, — лугьузва школадин чирвилеринни тербиядин рекьяй­ директордин заместитель Назлу Асалиевади.

Школадин директор Магьмуд Магьмудован гафаралди, Н.Ти­му­рова гьамиша вичин пешекарвилин устадвал хкажунал машгъул я. Ам тапшурмишнавай кlвалах­див жавабдарвилелди, гьакъисагъвилелди эгечlда. 2020-йисуз адан муаллимвилин тежриба умумиламишна, ахтармишна, райондин школайрин муаллимрин арада раижна ва адакай менфят къачун теклифна.

Кlвалахдал рикl алай, дамах гвачир, гьар са тарсуниз, аялдиз, тапшурмишай кар­диз дикъет гудай Надият Ханкишиевнадиз коллективдин, аялрин, диде-бубайрин патай лайихлу гьуьрмет ава.

Къагьриман Ибрагьимов