Жегьилар спортдал желбунин, и рекьяй абуруз мумкинвилерни шартIар тешкилунин месэла, виринра хьиз, дагълух районрани важиблубурукай сад я. Мукьвара зун Докъузпара райондин спортдин, жегьилрин сиясатдин ва туризмдин отделдин начальник  Агъаширинов  Агъашериф  Магьсудовичахъ  галаз гуьруьшмиш хьана.

А.Агъаширинов 1967-йисуз Усугъчай хуьре дидедиз хьана. Вуз куьтя­гьай­далай кьулухъ ада Докъузпарадин спортдин мектебда тренервилин, завучвилин ва эхирдайни директорвилин везифаяр кьилиз акъудна. 2009-2011-йисара ада райондин ДЮСШ-дин директорвиле кIвалахна. 2011-йисалай ам винидихъ тIвар кьунвай отделдин начальник я.

• Агъашериф Магьсудович, райондин сергьятра алатай йисуз спортдиз, жегьилриз, волонтерриз талукь гзаф мярекатар кьиле фена. Абурукай куьрелди ихтилатнайтIа кIанзавай.

— Жув кьиле авай отделдин кIвалах­дик маса хилерни акатзаватIани, жегьилар спортдал машгъул хьуниз, абурук ва­­танпересвилин гьиссер кутуниз датIа­на фикир гузва. Шадвализ жедай делил ам я хьи, спортдал датIана машгъул жез­вай жегьилрин кьадар йисалай-суз артух жезва. Алатай йисуз районда жуьреба-жуьре 39 мярекат тешкилна, гьа жергедай яз Яран, Гъалибвилин сувар­риз­ Рос­сиядин жегьилрин йикъаз талукь мя­рекатарни вини дережада кьиле фена.

• Спортдал машгъулбурун кьадар артух хьун мумкинвилерни артух хьунихъ галаз алакъалу я, тушни?

— Алай вахтунда районда 3 ДЮСШ кардик ква. Анра чи жаванар волейболдал, азаддиз кьуршахар кьунал, залан атлетикадал, футболдал, шахматрал, ка­­кахьай женгерал машгъул жезва. Спортдин майданар, залар ва тадаракламишнавай махсус чкаяр районда гзаф ава. Амма вири хуьрера девирдиз талукь спортзалар кардик квач. Алай йиса­лай, инвестор Шагьлар Бухсаеван ала­хъунар себеб яз, Миграгъ-Къазмайрин хуьрени спорткомплекс кардик акатна. Спортзал авачир патарив гвай хуьрерин жегьилризни ина машгъул жедай мумкинвал хьанва.

• ЦIи вилик акъвазнавай месэлаяр гьихьтинбур я?

— РД-дин физкультурадин ва спортдин рекьяй РД-дин министерстводи гьар йисуз республикада кьиле тухудай мярекатрин план гьазурзава. Адан бинедаллаз чнани са жерге акъажунар, турнирар тешкилда, къалурнавай мярекатра активнидаказ иштиракда. Районда гатун вахтунда азаддиз кьуршахар кьунай, волейболдай жуьреба-жуьре акъажунар тухун фикирдик ква. Ибурулайни гъейри, къаюмрин куьмекдалди гьар йисуз кьиле тухузвай адетдин акъажунарни акъвазардач.

ЦIинин йисуз тухванвай мярекат­рикай лагьайтIа, Афгъанистандай кьушунар ахкъудайдалай инихъ 30 йис ­тамам хьуниз талукьарна, 14-февралдиз азаддиз кьуршахар кьунай райондин кIвен­кIвечивал патал акъажунар кьиле фена.

24-февралдиз Кьиблепатан Дагъустандин спортсменрин иштираквал авай турнир тешкилна. Ана кьве шегьердин ва ирид райондин пагьливанри чпин алакьунар къалурна.

Яран сувариз талукь яз спортдин милли жуьрейрай Мискискарин хуьре акъажунар тухвана. Къван гадарунай 1-чка Сулейманов Багьадина (Усугъчай), 2-чка Мирзоев Жалила (Мискискар), 3-чка Агьмедов Руслана (Мискискар) кьуна. Алай чкадилай яргъаз хкадарунин акъажунра 1-чкадал Рамалданов Тельман (ЦIийи Къаракуьре) хьана. Кьвед ва пуд лагьай чкаяр Жамиев Абдурагьмана (ЦIийи Къаракуьре), Салимов Салима (Мискискар) кьуна. Путар хкажунай 1-чка Османов Султана (Махачкъала), 2-чка Мусабегов Нажмудина (ЦIийи — Къаракуьре), 3-чка Ибрагьимов Эмина (Мискискар) кьуна. Гъалибчийрив райондин кьил Абдурагьим Алискерова ва РД-дин Халкьдин Собранидин депутат Фирудин Ражабова дипломарни пулдин пишкешар вахкана.

Къейдна кIанда хьи, къаюмвилин жигьетдай Сарухан Гьажиевалай гъейри, Гьажи Кичибегова, Аразоври ва райондин кьил Абдурагьим Алискерова куьмекар гузва.

• Спортда еке агалкьунарни алакьунар авай докъузпарави пагьливанрин тIварар кьуртIа жедани?

— Абур чахъ тIимил авач. Къаракуьредай тир Атам Шихмурадов (азаддиз кьуршахар кьунай), ЦIийи-Къаракуьредай тир Артур Алискеров (какахьай женгерай), усугъчайвияр Абдурза ва Мегьамед Садировар (грэпплингдай), Алим Саидов (какахьай женгерай), Навруз Гьажиев (тайский боксдай) спортдин рекье еке агалкьунар хьанвайбурун жергедай я. Хейлинбуру республикадин, уьл­кведин ва дуьньядин дережада гъалибвилер къазанмишнава.

• Райондиз жуьреба-жуьре регионрай, къецепатан уьлквейрай къвезвай туристрин кьадарни артух жезва. Туризм вилик тухун патал гьихьтин кIва­лахар тухузва?

— Райондин мулкара туристар желбдай чкаяр гзаф ава. Патарилай къвезвай инсанар чи ерийрин гьавадин, тIе­биатдин шартIари гьейранарзава. Садра атайбур рикIе мад сеферда хквез кIан хьунин гьиссер аваз хъфизва. Гележегда Къурушрин хуьре туристрин лагерь кардик акатда. ЦIи а мулкара 4 коттедж эцигдай фикир ава, гьазурвилерни акунва. Райондин кьил Абдурагьим Алискерова туризм вилик тухуниз кьетIен фикир­ гузва. Ярудагъда альпинизмдай фес­тивалар кьиле физва. Алай йисан 2-февралдилай 15-февралдалди ана альпинизмдай Россиядин чемпионат тухвана. Ана уьлкведин регионрай 12  командади иштиракна. Сифте жергеда хьайи 6 командадиз  райадминистрацияди пулдин пишкешар гана.

Къурушдал туристар, Эренлардал зияратчияр гзаф къвезвайвиляй и хуьре къутармишдайбурунни жагъурдайбурун къуллугъ кардик кутунин месэлани вилик акъвазнава.

• Алатай йис волонтерринди тир. Чи жегьилри хушуналди гьихьтин крар тамамарна?

— Вири мярекатра, серенжемра иштиракна. Абурук наркоманиядиз, терроризмдиз аксивал къалуруниз талукь мя­рекатарни ква. РД-дин жегьилрин крарин рекьяй министр К.Саидова, волонтеррин йисан сергьятра аваз, талукь проектар республикада уьмуьрдиз кечирмишунай чи район III дережадин дипломдалди къейдна.

Куругъли Ферзалиев