Малум тирвал, алай вахтунда чи ва къецепатан уьлквейрин машгьур зарийрин литературадин эсерар хуралай кIелунин, акьалтзавай несилди библиотекайрихъ галаз алакъаяр хъсанарунин, бажарагълу жаванар жагъурунин ва абур ашкъиламишунин барадай “Чан алай классика” лишандик кваз жаванрин арада шиирар хуралай кIелдай Вирироссиядин конкурсдин муьжуьд лагьай пай кьиле физва.
Виринра хьиз, Дербент шегьердин мектебра кIелзавайбурун арадани конкурс итижлудаказ кьиле фена. Бажарагълу 124 аялди иштиракай акъажунра 59 кас гъалибчияр малум хьана. Виниз тир устадвал 14-нумрадин мектебдин ученица Рашидат Османовади, 12-нумрадин юкьван мектебда кIелзавай Милана Ризаевади ва 2-нумрадин гимназиядин ученица Амана Шагьовади къалурна. Конкурсдин гъалибчийрин агалкьунар дипломралди ва рикIел аламукьдай пишкешралди къейдна.
Нариман Къарибов
