25-декабрдиз Сулейман-Стальский районда майишатрин ятар гудай “Кировский” уртах къаналдин кьвед лагьай пай шадвилин гьалара ачухна. Къаналди КIварчагъ дередин ва Табасаран райондин са жерге хуьрерин агьалияр дигидай целди таъминарзава. Идан гьакъиндай “Лезги газетдиз” муниципалитетдин администрациядин пресс-къуллугъди хабар гана.
Шадвилин мярекатда Сулейман-Стальский райондин кьил Нариман Абдулмуталибова, “РД-дин Минмелиоводхоз” ФГБУ-дин директор Залкип Къурбанова, РД-дин Халкьдин Собранидин депутат Гьамидулагь Мегьамедова, райондин депутатрин собранидин председатель Штибег Мегьамедханова, “РД-дин Минмелиоводхоз” ФГБУ-дин директордин сад лагьай заместитель Бигиш Чаниева, проект гьазурай ва пудратдин организацийрин векилри, райадминистрациядин къурулушдик акатзавай идарайрин руководителри, хуьрерин кьилери, общественностдин ва СМИ-рин векилри иштиракна.
Къейд авун лазим я хьи, “Кировский” къаналдин кьвед лагьай пай цIийикIа туькIуьр хъувунин кIвалахар 2017-йисуз гъиле кьурди тир. 7565,46 метрдин мензилдиз тухванвай къаналди Сардархуьруьн кефердинни рагъакIидай патай кьил къачузва ва ам Курхуьруьн кефердинни рагъэкъечIдай патан къерехдив агакьдалди 0,3 километр амаз акьалтIзава. Бетон тунвай кIаняй къаналдин гьяркьуьвал 1,50 метрдиз, деринвал 1,30 метрдиз барабар я. И имаратдал кIвалахар тухвана куьтягьнава, ахтармишун патал анай ядни ахъайнава. Ятар гудай системадин имаратарни галаз майишатрин уртах «Кировский» къанал цIийикIа туькIуьр хъувуни 2500 гектардин майданра цик квачир чилер дигизвайбуруз элкъуьрдай мумкинвал гузва. Ида хуьруьн майишатдин культурайрин бегьерлувал хкаждай ва агропромышленный комплексдин хиле цIийи инвестпроектар кардик кутадай мумкинвал гуда. Райондин уьзуьмчивилел ва багъманчивилел машгъул жезвай мулкариз яд акъудун ина яшамиш жезвай агьалийрин чIехи бубайрин эрзиман мурад тир. Алатай асирдин юкьварилай и планрал сакIани кIукI гъиз жезвачир. Гила Чирагъ вацIун яд КIварчагъ дередиз вич-вичелай авахьна къведайвал авунин барадай НуьцIуьгърин, Экенрин, Зизикрин ва КIварчагърин хуьрерин агьалийрин мурадар кьилиз акъатна.
Пландик кутунвайвал, къаналдал кIвалахар 2018-йисуз акьалтIарна. Райондин кьил Нариман Абдулмуталибова и вакъиадихъ Сулейман-Стальский райондин, гьакIни Табасаран райондин са жерге хуьрерин агьалийрин уьмуьрда важиблу метлеб авайди къейдна: “Къенин югъ неинки Сулейман-Стальский райондин, гьакI къунши районрин уьмуьрдани лишанлуди я. Им райондин агьалийрин нубатдин агалкьун я. Чаз экономикадин, яшайишдин ва культурадин рекьяй ихьтин гъалибвилер чарасуз герек я. Алатай асирдин 50-йисара чи чIехи бубайри керкиярни лопаткаяр гваз и къанал туькIуьрунин кIвалахар гъиле кьунай. Амма зегьмет гзаф алайвиляй абурулай чпин эрзиман мурад кьилиз акъудиз алакьначир. Къе чун зурба вакъиадин шагьидар хьанва. Пешекарри са куьруь вахтунда еке кIвалах тухвана, КIварчагъ дередиз яд гъана. Яд галачиз уьмуьр кьиле тухуз жедайди туш. И проект кардик кутунин нетижада районда хуьрерин мулкар вилик тухунин Комплексный программа, агропромышленный секторда маса инвестпроектар уьмуьрдиз кечирмишиз жеда. Заз Дагъустан Республикадин Кьил Владимир Васильеван, РД-дин Гьукуматдин, РД-дин “Минмелиоводхоз”-дин кьиле авайбурун, проектировщикрин, пудратчидин ва халкьдин эрзиман мурад кьилиз акъудунихъ галаз алакъа авай вирибурун тIварарихъ разивилин келимаяр лугьуз кIанзава”.
Вичин рахунра “РД-дин Минмелиоводхоз” ФГБУ-дин директор Залкип Къурбанова къейдна: “И чIехи проект кардик кутунин нетижада гележегда пар квай хейлин проектар кьилиз акъудиз жеда. Им чи республика патал хъсан чешне я. Чна умуд кутазвайвал, мелиорациядин авай фондар хуьнихъ ва абур ишлемишунин кIвалах хъсанарунихъ элкъуьрнавай и лишанлу карди районда гьасилзавай хуьруьн майишатдин продукциядин кьадар артухардай, агьалияр суьрсетдалди умудлудаказ таъминардай, агропромышленный комплекс алай аямдин истемишунрин дережада аваз мадни вилик тухудай мумикнвал гуда”.
Мярекатдал РД-дин Халкьдин Собранидин депутат Гьамидулагь Мегьамедов, “Дере” ООО-дин директор Загьидин Тажибов ва маса ксар рахана. “Кировский” къаналдин кьвед лагьай пай ачухунин шадвилерин сергьятра аваз райондин кьил Нариман Абдулмуталибова “РД-дин Минмелиоводхоз” ФГБУ-дин директор Залкип Къурбановаз ва проектдин руководитель Тажир Абакароваз абур Сулейман-Стальский райондин Гьуьрметлу агьалиярвиле кьабулнавайвилин дипломар ва знакар гана. “Шер” АО-дин генеральный директор Тельман Гьасановав ва “РД-дин Минмелиоводхоз” ФГБУ-дин директордин сад лагьай заместитель Бигиш Чаниевав “Сулейман-Стальский район” муниципальный райондин гьуьрметдин грамотаяр, ФЦП-дин КС-дин отделдин кар алай инженер Далгат Муртазаевав ва “Шер” АО-дин прораб Аскандар Максудовав чухсагъулдин чарар вахкана.
Гуьгъуьнлай цIийи къаналдай авахьзавай цел лишанлу гими авудна. И.Гь.Тагьирован тIварунихъ галай культурадин дворецдин артистри кIватI хьанвайбуруз концерт гана.
«Лезги газет»
