Чна виликамаз хабар гайивал, алатай гьафтеда Каспийскда, Али Алиеван тIварунихъ галай Спортдин дворецда, Россиядин Игит Адильгерей Мегьамедтагьирован экуь къаматдиз бахшна, женгинин самбодай ачух чемпионат кьиле фена. Ам ачухуниз талукь шад мярекатда Дагъустандин Гьукуматдин Председатель Артём Здунова, РД-дин Кьилин ва Гьукуматдин Администрациядин Руководитель Владимир Иванова, РФ-дин Госдумадин ва Дагъустандин Халкьдин Собранидин депутатри, республикадин министерствойринни ведомствойрин векилри, машгьур спортсменри, мугьманри… иштиракна.
— Гьуьрметлу тешкилатчияр, акъажунрин иштиракчияр ва мугьманар! Куьн Виридуьньядин женгинин самбодин федерациядин ачух XXIV чемпионатдиз атунал чна шадвалзава. И жуьредин спортдин мярекат кьиле тухун патал чи республика хкягъун мадни шад кар я. Чаз единоборствояр хуш тирвиляй ихьтин акъажунар Дагъустанда садрани-кьведра кьиле тухванач. Чаз спортсменрихъ агалкьунар хьана кIанзава. Къуй викIегьбур гъалиб хьурай! — алхишна Артём Здунова, мярекат ачухдайла.
Вичин рахунра Дагъустандин къенепатан крарин министр Абдурашид Мегьамедова Адильгерей Мегьамедтагьиров РФ-дин къенепатан крарин органрин къурулушда зурба гел тур кас тирди къейдна, РД-да авай МВД-дин къуллугъчийрин тIварунихъай адан экуь къаматдиз бахшнавай спортдин зурба мярекат тешкилайбуруз чухсагъул, спортсменрихъни агалкьунар хьана кIанивилин келимаяр лагьана.
Гуьгъуьнлай мярекатдал женгинин самбодай Виридуьньядин ва Вирироссиядин федерацийрин Президент Алексей Малый рахана. Ада какахьай единоборствойрай чна вири дуьньядиз виридалайни хъсан гьазурлухвал къалурзавайди къейдна.
— Женгинин самбо, аскерриз тербия гудай къайда яз, гзаф асирар идалай вилик арадал атайди я. И къайдадикай гьам Суворова, гьамни Кутузова, махсус отрядрин гьазурлухвал аквадайла, менфят къачунай, — рикIел хкана ада.
— Сирлу къайда чна спортдин массовый ва виридан тIем акакьдай жуьредиз — женгинин самбодиз — элкъуьрна. Адал дуьньядин вишералди уьлквейрай миллионралди спортсменар машгъул жезва. Какахьай единоборствойрин майданрал чна дуьньядиз гьазурлухвилин виридалайни хъсан къайда къалурзава. Чна аскерар, спортсменар, Россиядин халис гражданар, ватан хуьдайбур, чи чил хуьз алакьдайбур вердишарзава. Спортдин къенин мярекатда виридалайни хъсан спортсменар кIватI хьанва. Къуй викIегьди гъалиб хьурай!
Шад мярекатдал Адильгерей Мегьамедтагьирован багъриярни рахана.
Гуьгъуьнлай майдандал дуьньядин 16 уьлкведай атанвай 130-далай виниз спортсменри чпин устадвал ва алакьунар къалурна. Ачух чемпионатда Виридуьньядин женгинин самбодин федерацияди (ВФС) кьилди команда яз иштиракна. ИкI, заланвилин 7 категориядай агъадихъ галай спортсменар 1-чкайриз лайихлу хьана: Рашид Вагьабов (57 кг, Россия), Хабибулло Азизов (62 кг, Тажикистан), Марат Мегьамедов (68 кг, ВФС), Жора Айвазян (74 кг, Россия), Мовсар Боков (82 кг, Россия), Максим Швец (90 кг, ВФС), Паша Хархачаев (90 кг-дилай виниз, Бахрейн).
Къейд ийин хьи, Дагъустандин единоборствойрин школада вердишвилер къачур Паша Хархачаев чемпионатдин кьилин пишкешдиз-Адильгерей Мегьамедтагьирован хизанди тайинарнавай автомашиндизни лайихлу хьана.
Чи мухбир
