4-февралдиз, рак азардихъ галаз женг чIугвадай юкъуз, “Республикадин онкологиядин центр” ГБУ-ди, “Дагъустандин хурун хирургиядин центр” ГБУ-ди 2019-йисан кIвалахдин нетижаяр кьуна. Дагъустандин здравоохраненидин министр Жамалудин Гьажиибрагьимован регьбервилик кваз коллегиядин заседание Онкоцентрадин бинедаллаз кьиле фена.
ИкI, алай вахтунда Россияда онкологиядин азаррик начагъбурун кьадар 3,7 миллиондилай алатнава. Абурукай 28 агъзурдалай виниз Дагъустанда учетда ава. Вири уьлкведа хьиз, чи республикадани чпиз ракдин диагноз эцигнавай ксарин кьадар йисалай-суз артух жезва. Мисал яз, 2019-йисуз сифте яз онкологиядин азарар акатнавай 4875 кас дуьздал акъудна. Им, алатай йисав гекъигайла, 59 касдин гзаф я. Амма, гьикI ятIани, Дагъустанда онкологиядин азарар квай ксариз талукь делилар Россиядин юкьван делилрилай агъузбур я.
Республикада виридалайни гзаф азарлуяр жигеррин ракдик рекьизва. И барадай кьвед лагьай чкадал хуквадин рак, пуд лагьай чкадал некIедин железадин рак, кьуд лагьай чкадални ратарин рак ала.
Идахъ галаз сад хьиз, 2019-йисуз Дагъустанда онкологри ракдин азар акатнавайди вахтундамаз дуьздал акъудунин кIвалах активламишнава. ИкI хьайила, азарлуяр сагъар хъийиз хьунин мумкинвилер артух жезва. Республикада ракдик азарлувал сад ва кьвед лагьай дережайрив агакьнавай 1183 кас дуьздал акъудна. Идакайни 351 касдик онкологиядин азар акатнавайди диспансеризация кьиле тухудай вахтунда малум хьана. Аялдин кIвалин, щитовидный железадин, цварахъандин рак акатнавайди дуьздал акъудунин кIвалах хъсан хьанва. Ихьтин мумкинвал УЗИ-дин, эндоскопиядин ахтармишунар, вахт-вахтунда профилактикадин серенжемар кьиле тухунин нетижада арадал атана.
Амма, РД-дин здравоохраненидин министр Жамалудин Гьажиибрагьимован фикирдалди, участковый сетда, килигдай кабинетра профилактикадин кIвалах бес кьадардин дережада аваз тешкилнайтIа, нетижаяр мадни винизбур жедай. Лагьана кIанда хьи, ракдин азар акатнавайди асул гьисабдай гьа сетда ва килигдай кабинетра дуьздал акъудзавайди я. 2020-йисуз центрадин кьиле авайбурал и кIвалах гужлу авун тапшурмишнава.
И месэладиз талукь гегьенш делилар РД-дин Минздравдин сайтда ава.
«Лезги газет»
