Рак азардиз акси женг тухунин Виридуьньядин йикъан (4-февраль) вилик Москвада “Чун яшамиш жеда” милли премиядин сагьибар тебрикуниз талукьарнавай мярекат кьиле фена.
Премиядин асул макьсад жемиятдин гегьенш къатариз хаталу тIегъуьндикай хабар гун, адан вилик пад кьун, и азардик начагъ хьанвайбуруз куьмекун я.
Премия Урусатдин машгьур онкологриз, вилик къаст эцигна, и азардихъ галаз женг чIугвазвайбуруз, медицинадин мергьяматлувилин виридалайни хъсан идарайриз, жемиятдин, медениятдин векилриз, журналистриз ва масабуруз гузва.
2020-йисуз и премия къачурбурун арада чи ватанэгьли, юрист, консультант, яшайишдин сиясатдин рекьяй эксперт Арсен Сеферович Абдурагьимовни ава. Адан ери-бине Кьурагь райондин КьепIиррин хуьряй я. Алай вахтунда ватанэгьлиди РД-дин Кьилин ва Гьукуматдин Администрацияда кIвалахзава.
Чна Арсен Абдурагьимоваз и агалкьун рикIин сидкьидай мубаракзава ва адахъ мадни еке агалкьунар хьана кIанзава.
Агьмед Магьмудов
