Дагъустанда улакьар фин патал чукIурна (разбор) кIватI хъийиз жедай муькъвер гьазурун пландик кутунва. Гьахьтин муькъвер республикадин дагълара эцигдайвал я. Тамам тушир делилралди, и жуьредин саки 100 муькъуьн патахъай игьтияж ава. Идан гьакъиндай “Лезги газетдиз” РД-дин Кьилин ва Гьукуматдин Администрациядин пресс-къуллугъди хабар гана.
Республикадин Кьил Владимир Васильеван регьбервилик кваз тухвай нубатдин совещанидал ашкара хьайивал, и рекьяй кIвалах гъиле кьунва. ИкI, алатай йисуз Дагъустандин МЧС-дин игьтияжар патал “КЭМЗ” концернди чукIурна кIватI хъийиз жедай, 32 метрдин яргъивал алай сифтегьан муьгъ гьазурна. И мурадар патал 6 миллион манатдин такьатар чара авуна. Гъиле авай йисуз 15 муьгъ гьазурун патал 94 миллион манатдин такьатар чара авун фикирдиз къачунва.
И делилар Дагъустандин промышленностдин ва энергетикадин министрдин заместитель Батыр Эмеева раижна.
Адан рахунриз баянар гайи В.Васильева къейд авурвал, республикадивай ахьтин муькъвер туькIуьрун патал мадни гзаф такьатар чара ийиз, гьатта вири 100 муьгъни санлай гьазуриз жеда. Амма и кар патал налогар гана кIанда.
Ада къейд авурвал, муькъвер эцигунин кIвалах гзаф важиблуди я, гьикI лагьайтIа Дагъустан дагълух республика я. “Муькъвер алачиз вацIалай элячIиз тежезвайвиляй улакьар алава яз 20 километрийрив агакьна мензилар атIуниз мажбур жезва. Нетижада и кар инсанриз къулай жезвач”, — къейдна республикадин регьберди.
Владимир Васильева алава хъувурвал, и ва са жерге маса месэлаяр гьялун патал налогар гун герек я. Ада рикIел хкайвал, налогар гуникди алава яз агакьай такьатрин гьисабдай мектебар патал автобусар къачуна, мектебрин ва маса дараматар ремонтзава. “Налогар тамам кьадарда гузвай ксар сагърай. Эгер чна далдаламишнавай къазанжийрилай къвезвай налогар къачудай мумкинвилер жагъурайтIа ва инсанар налогар гунин гьисабдай чавай хейлин крар бажармишиз жедайдан гъавурда тваз хьайитIа, виниз тир нетижаяр къазанмишиз жеда”, — гьисабзава республикадин Кьили.
«Лезги газет»
