Дагъустандин здравоохраненидин министерстводин пресс-къуллугъди хабар гузвайвал, алай вахтунда Махачкъалада медицинадин кьве идарада  ярар ва паротит (свинка) азарар пайда хьунихъ галаз алакъалу яз карантин малумарнава.

Республикадин аялринни жаванрин нервийринни психикадин сагъламвал хуьдай центрада 4 аялдиз ярар атанвайди, гьакIни Республикадин клинический (центральный) больницадин аялар хадай кIвалин са отделенида кIвачел залан дишегьлидик паротит акатнавайди малум хьанва. Абурукай садазни прививкаяр авунвачир.

Чна виликдайни хабар гайивал, Дагъустанда ярар ва паротит азарар акатунин дуьшуьшар артух жезва. ИкI, алай йисан алатна­вай варцара Дагъустанда 172 касдиз ярар атана, 1000-далайни гзафбур паротитдикди на­чагъ хьанва. Медицинадин къуллугъчийри­ ихьтин дуьшуьшар артух хьун агьалийри азар­­­риз акси рапар ягъуникай кьил къа­къу­ду­­нилай аслу яз гьисабзава. Идахъ галаз ала­къалу яз алай вахтунда республикада и азаррин вилик пад кьуниз талукь серенжемар артухарнава. Тамамдаказ ва лазим вири рапар ягъ  тавунвай аялар бахчайриз, секцийриз ва кружокриз кьабулзавач, школайризни ахъайдач. Пландин бинедаллаз чпин сагъламвал мягькемарун лазим тир азарлуярни, эгер лазим рапар яна­вачтIа, больницайра къаткурзавач.

Дагъустандин здравоохраненидин министерстводи ярар аялар кьиникьал гъизвай кьилин себеб тирдал мад сеферда фикир желбзава. И азардикай хуьдай дарман авач. Паротит азарни гзаф хаталуди я. Ада чIуру нетижайрал гъун, гьатта азарлу хьайи гадайриз гележегда аялар тахьунни мумкин я.

* * *

Азардин вилик пад кьадай рапар ягъуникай кьил къакъудун себеб яз республикада коклюшдик азарлу хьайибурун кьадар 161-дав агакьнава. Пешекарри къейдза­вайвал, абурун чIехи пай аялар я. РикIел хкин: коклюшдиз, дифтериядиз, столбнякдиз акси рапар (АКДС) аялдиз, 3 вацралай башламишна, 3 йис тамам жедалди 3 сеферда язава.

Коклюшдик начагъ хьайибуруз и азардикай уьмуьрлух иммунитет жезвайди туш, адакди уьмуьрда 2-3 сеферда начагъ хьун мумкин я. Гьавиляй ВОЗ-ди яшариз талукь яз адакай хуьдай рапар ягъун меслят къалурзава.

Гьазурайди — Рагнеда Рамалданова