Зи кефсузвиликай хабар хьайи са касди заз и карда куьмек гун яз, невропатолог Рамис Таибович Мамедован патав фин меслят къалурна. За хийир кIанзавайда лагьайвал авуна. Гьатна зун Дербентдиз рекье, а духтур гьана яшамиш жезва. Къекъвена, жагъурна духтурдин кIвал, залай вилик пуд кас мад квай. Жувал нубат атайла, кабинетда ацукьна, кар-кеспидикай ихтилатар башламишна чна.
“Сифте дерди, ахпа ихтилатар”, — куьрелди лагьана ада. И кьуд гафунай заз ам инсандин дидарда авай халис пешекар тирди чир хьана. Ахтармишна ада хъсандиз зи сагъламвилин гьал. Хейлин суаларни гана. Зи жавабрихъни ада дикъетдивди яб акална. Гьа са вахтунда ада тайин меслятарни кхьена, анжах-кьве дарманни.
Ахпа чна вичин тIвар Дербентдилай анихъни фадлай машгьур хьанвай тежрибалу невропатолог Рамис Таибовичахъ галаз рахунар давамарна.
Зи фикирдин гъавурда гьатай ада суьгьбетиз башламишна. Малум хьайивал, Рамис 1940-йисуз Дербентда муаллимдин хизанда дидедиз хьана. Патав гвай Сабнавада аял вахтар акъатна. Ада сифте 5, ахпа 1-нумрайрин мектебра кIелна. Адан ими Бедал Мамедов РД-дин лайихлу духтур тир. 7-класс куьтягьай Рамисни медучилищедик экечIна. Хъсан чирвилер къачур ада ракьун рекьерин больницада зегьметдин рехъ башламишна. 1959-1963-йисара ада Севастополда армиядин жергейра къуллугъна, частуна ва ученийриз фейи вахтарани аскерриз медицинадин рекьяй куьмекар ийиз хьана. Вичи рикIел хкайвал, частунин командир, 1-рангдин капитан, рикIин приступ хьайила, дуьз диагноз эцигна, серенжемар кьабулна, ада кьиникьикай къутармишнай. И кардай матрос, медбрат яз хьайи Рамис Мамедоваз чIехи командирри чухсагъулар малумарнай, къиметлу пишкешни ганай.
Армиядилай кьулухъ, 1964-1970-йисара, Рамис Таибовича Дагъустандин мединститут акьалтIарна, ахпа (1972-1974-йисар) ординатурада кIелна, вичин чирвилер мадни артухарна, гьа са вахтунда тежрибани кIватIна. Ада и вахтунда шегьердин 1-нумрадин поликлиникадани кIвалахиз хьана. 1974-йисуз Рамис Мамедов Дербентдиз хтана, ам шегьердин центральный больницадин кьилин духтурдин, сагъарунин рекьяй заместителвиле кIвалахал эцигна. Начагъбуруз адан меслятрикай, дуьз диагноз эцигуникай дава-дарман жезвай. Духтурдилай разивал къалуриз, абуру адаз чухсагъул лугьуз хьана. Р. Мамедова эцигай диагноз гьамиша дуьз акъатунин нетижада ада профессоррихъ галаз консилиумрани гзаф сеферра иштиракнай. Тежрибалу невропатологдин гуьзчивилик Огнидин участковый больница ва Берикейдин больницани кутунвай. Виринрихъ Рамис Таибович агакьзавай. Адан серенжемрикай себеб хьуникди холера, тиф, сибирдин язва азаррин вилик пад вахтунда кьаз алакьнай. ИкI, ада вичин хиве авай жавабдар кIвалах кьиле тухуз хьана. 1979-йисуз Дербентда цIийи больница кардик кутурла, Рамис Таибович анин неврологиядин отделенидин заведующийвиле тайинарнай. Ада ина са фикирдаллай духтуррин хъсан коллектив тешкилна. Кьилин духтурар хьайи Ян Сауридихъ, Къурбан Сулеймановахъ, Фарман Абумуслимовахъ, Дашдемир Къарахановахъ галаз дуствилин рафтарвал хуьналди, бегьерлудаказ зегьмет чIугуна. Рамис Мамедован тIвар, виликрай хьиз, исятдани шегьерда кар чидай, гъавурда аваз кIвалах-завай духтур-невролог яз кьазва. Адаз еке гьуьрмет, авторитет ава.
Алай вахтунда тежрибалу духтур Рамис Мамедов пенсияда аватIани, азарлуяр кьабулзава, вичин патав атайбуруз куьмекзава.
Гаф кватай чкадал лугьун кутугнава, Дербентдин центральный больницада Рамис Мамедован пеше адан хва, медицинадин илимрин кандидат Таиб Рамисович Мамедова давамарзава. Бубадилай чешне къачуналди, адани хъсандиз зегьмет чIугвазва.
Р. Мамедов гзаф наградайрин сагьиб я. Мукьвара адан зегьметдин рекьин 60 йис тамам хьун къейдна. Чи мурад Рамис Таибовичахъ мадни яргъал йисара чандин сагъвал хьун я.
Райсудин Набиев
