Медицинадин илимрин доктор, профессор Къудрат Муьгьуьдинович Абдулкъадиров Санкт-Петербургда вичиз гьахълудаказ гьуьрметзавай инсан яз сейли хьана. Дагъустанвийри лагьайтlа, ам республикадин дамах яз гьисабзавай.
Къ.Абдулкъадиров 1933-йисуз Мегьарамдхуьруьн райондин Ярагъ-Къазмайрин хуьре муаллимдин хизанда дидедиз хьана. Медицинадин рекьяй авай зурба алакьунри ам ахьтин кукlушрив агакьарна хьи, чи ватанэгьли РФ-дин лайихлу духтур, РФ-дин илимрин лайихлу деятель, Нью-Йоркдин илимрин академиядин гьакъикъи член, кlарабдин мефтI трансплантация авунин рекьяй международный регистрдин, Вирихалкьарин информатизациядин Академиядин, РФ-дин естествознанидин Академиядин, Европадин гематологрин ассоциациядин член, Санкт-Петербургдин кьилин гематолог хьана.
Къудрат Абдулкъадирова кlвалахай медицинадин илимдинни ахтармишунрин институт РФ-дин сергьятра гематологиядин ва трансфузиологиядин месэлайрай кьилин идара, сагъарунин ва ахтармишунрин зурба центр я. И институтда Къудрат духтурди клиникадин отделдиз хейлин йисара регьбервал гана. Лезги профессор къадав агакьна монографийрин, пешекар духтурар патал са шумуд учебникдин, медицинадин рекьяй цlийи жуьредин куьмекчи ктабрин, гьам чи, гьамни къецепатан уьлквейрин чешмейра чапнавай гематологиядинни трансфузиологиядин важиблу месэлайрай вишералди илимдин макъалайрин автор я. Ада медицинадин илимда къад кьван цlийи затlар арадал гъана. Къудрат Муьгьуьдиновича вичин регьбервилик кьве вишелайни гзаф алимар, пешекарар — медицинадин илимрин кандидатар ва докторар гьазурна. Ам 2004-йисалай пуд вацра садра чапдай акъатзавай илимдинни тежрибадин “Вестник гематологии” махсус журналдин тешкилатчи ва кьилин редактор хьана. Кlвалахай медидарада ада вичин регьбервилик кваз гематологиядин ва клиникадин трансфузиологиядин кар алай месэлайрай вахт-вахтунда вирироссиядин ва международный илимдинни тежрибадин конференцияр ва маса мярекатар кьиле тухвана.
Къудрат Абдулкъадировахъ Санкт-Петербургдин гьукумди кьилинди яз гьисабай илимдинни педагогикадин вичин мектеб хьана.
Чlехи наградайрин, зурба алакьунрин иеси хьайи Къудрат духтур 2016-йисуз залан азардикди Санкт-Петербургда кечмиш хьана.
Гьазурайди — Куругъли Ферзалиев
