И йикъара Ахцегь райондин Хуьруьг хуьруьн муьгъ къайдадик кухтунин кIвалахар кьиле физва. Идакай «Лезги газетдиз» райадминистрациядин пресс-къуллугъди хабар гана.

РикIел хкин, алатай йисан августдин вацра къати марфар къунин нетижада ятар алахьуникди райондиз, гьа жергедай яз хуьруьгвияр чпин саларизни никIериз фидай муькъуьзни зарар хьанай. А чIавуз селлери муькъуьн кьве кьилик квай дестекрин кIан хкудуникди муьгъ чкIанай.

Муьгъ цIийи хъувунин, дестекар мягькемарунин гьакъиндай кьабулай къарардин бинедаллаз, залан техникани, чкадин агьалиярни желбна, мартдин сифте кьилелай ремонтдин кIвалахар кьиле физва.

И йикъара райондин кьил Осман Абдулкеримова муьгъ ремонтзавай кIвалахар ахтармишна. Ада Хуьруьг хуьруьн администрациядин кьил З.Сулеймановахъ ва кIвалахзавай ксарихъ галаз суьгьбетар кьиле тухвана.

Хуьруьгвийри къейд авурвал, муьгъ туькIуьр хъувун лап чарасуз ва важиблу месэла я. Муькъвелай маларни гьалзава, агьалияр чпин саларизни физва.

«Лезги газет»