Алай йисуз Мегьарамдхуьруьн райондин Советский хуьр арадал атана 70 йис тамам хьанва. Ам кьуд райондик акатзавай дагълух ирид хуьруькай ибарат я. Гьикьван четинвилер гьалтнатIани, и хуьрерин агьалийри, гъил-гъиле кьуна, вири жуьредин къулайвилер авай Советский хуьр арадал гъана. Къе ам шегьердиз ухшар хьанва.
Жегьилриз, къвезмай несилриз и гуьзел хуьр чпин диде-бубайри гьикI арадал гъайиди ятIа, абуру гьихьтин четинвилериз дурум ганатIа чир хьун патал анин гьуьрметлу агьалияр тир Пашаев Сулеймана ва Велиев Буньяма “Куьредин ярар” культурадин центрадин куьмекдалди “Советхуьр” тIвар алаз 286 чиникай ибарат чIехи форматдин тарихдин ктаб туькIуьрнава. Абуру и ктабда тамарини кIачIичIри кьунвай, вагьши гьайванри агъавалзавай чIурухъан чилерикай гьакьван аваданлу макан туькIуьрунин карда агъсакъалрин зегьмет екеди хьайиди ашкара ийизва, тарихдин делилар гъизва, гьакъисагъ зегьмет чIугур инсанрикай кхьенва ва абурун шикиларни ганва.
“Вичин тарих тийижир халкьдихъ гележег жедач”, — лагьанай М.Ломоносова. Ихьтин маналу ктабда тарих гьатнавай Советский хуьруьхъ, адан жемятдихъ къедлай кьулухъ мадни бахтлу, гуьзел гележег жедайдал шакни алач. Квез 70 йисан юбилейни цIийи ктаб мубаракрай, Советский хуьруьн агьалияр!
Агьмедпаша Агьмедпашаев
