Уьлкведин “Россия 1” телеканал музыкадин “Ну-ка, все вместе” теле-шоудив кьвед лагьай сеферда гатIун хъувунва. Гьар гьяд йикъан нянихъ конкурсдин иштиракчийрин манийриз жюридик квай 100 касди (тIвар-ван авай манидарар, композиторар, продюсерар, уьлкведин вокалдин вузрин преподавателар, музыкадин блогерар) къимет гузва.
Жюридин кьиле уьлкведин эстрададин гъед Сергей Лазарев ава. Теле-шоудин шагьни (ведущий) виридаз машгьур Николай Басков я. Конкурсдин приз 1 млн манатдиз барабар я.
Конкурсдин сифте юкъуз сегьнедиз экъечIай 8 касдин арада НТВ каналдин “Ты супер” конкурсдин гъалибчи, чи тават руш Карина Исмаиловани авай. Гуьрчег цуькведиз ухшар руша пара милайимдиз ва устадвилелди лагьай манидиз 100 касдикай 89 касди сес гана ва ам финалдиз акъатна. Ирина Олиферди, Никита Малинина, Кристина Корольковади, Олег Владиди Каринадин лап тарифна. Жюридин са векилдин тIалабуналди, Каринади лезги чIалалдини “Муьгьуьббатдин лувараллаз” мани лагьана ва адаз мадни гурлу капар яна.
Чи мурад сад я — Каринадикай финалдани гъалибчи хьун!
Хийир Эмиров
